1925 чылдың август 31-де үнүп эгелээн

«ЭНЕ-САЙНЫҢ» БАЙЫРЛЫГ АЖЫДЫЫШКЫНЫ

Сентябрь 1-ниң хүнүнде Кызыл хоорайга дөрт сылдыстыг Эне-Сай аттыг чаа аалчылар бажыңының байырлыг ажыдыышкыны болган. Ук аалчылар бажыңының тудуун «БЭНКОНС» компания 2014 чылдың август 20-де эгелээш, 2017 чылдың август 30-ниң хүнүнге чедир бүрүнү-биле тудуп дооскан.
Эне-Сай аттыг дөрт сылдыстыг аал­чы­лар бажыңының дэвискээринде 23 машина тургузар чер бар.  Ооң бирги каъды­нда 100 олуттуг чемненир чер, лобби-бар, массаж өрээли, сауна, чунар өрээлдер, чараштаныр салон, бассейн спорт залы болгаш аалчылар уткуп-хү­лээр, дыштаныр өрээлдер бар. А ийиги каътта ажылчыннарның ажылдаар өрээлдери база хурал-суглаа эрттиреринге эптиг улуг залдарны кылган.
Үшкү каъттан чедиги каътка чедир чуртталга өрээлдери. Ында ийи президент өрээли, 31 люкс, 75 чаңгыс аай өрээлдер, ниитизи-биле 108 өрээл бар.
Байырлыг ажыдыышкынга Тываның Чазак Баштыңы Ш.В. Кара-оол болгаш ооң оралакчызы А.П. Дамба-Хуурак, куль­тура сайыды А.К. Тамдын база олар-биле кады хүндүлүг аалчылар – РФ-тиң өөредилге яамы­зының сайы­ды Ольга Васильева болгаш РФ-тиң Президентизиниң Сибирь федералдыг округунда төлээзи Сергей Меняйло келгеннер.
Тываның Баштыңы Ш. Кара-оол аалчылар бажыңының ажыдыышкынында чүве чугаалааш, «БЭНКОНС» компанияның директору Шариф Гаджиевке, «Юность» КХН-ниң бригадири Игорь Салчакка хүндүлел бижиктерни, «БЭНКОНС» компанияның вице-президентизи Фаик Мамедхановка «Тыва Республиканың алдарлыг ажылдакчызы» атты тывыскан соонда, аалчылар бажыңының байырлыг ажыдыышкынынче хүндүлүг аалчыларны чалаан.
Ш.В. Кара-оол хүндүлүг аалчылар-биле кады кызыл кожааны үзе кезип, аалчылар бажыңынче киргеш, ооң бирги, ийиги, үшкү каъдында өрээлдерни эргип хынап көрген. 
Байырлыг ажыдыышкын үезинде чыглып келген чонга республиканың В.Ш. Көк-оол аттыг национал хөгжүм-шии театрының артис­тери солун оюн-көргүзүглүг концертин бараалгатканнар.
Эрес КОЛ.
Авторнуң тырттырган чуруу.

Санал-онал немээри

CAPTCHA на основе изображений
Чурукта айыттынган демдектерни киириңер.