1925 чылдың август 31-де үнүп эгелээн

АВАМГА ТУРАСКААТТЫМ

Частың чараш байырлалы Март 8-тиң бүдүүзүнде иелерге тураскааткан «Посвящаю маме. Авамга тураскааттым. To my mother» деп чараш аттыг мөөрей эгелээн. 
Тыва Республиканың Баш­тыңының хайгаара­лының адаа-биле эртип турар мөөрейниң суму чергези Тес-Хемниң Белдир-Арыг сумузунуң Культура бажыңынга март 6-да эгелээн. Ол хүн Чыргаланды база Самагалдай сумуларның культура ажылдакчылары катчып алгаш, Белдир-Арыг сумузунуң культура одааның баазазынга бо мөөрейни эгелээн. Аңаа ук сумулардан школачылар, культура ажылдакчылары, күзелдиг чон идепкейлиг киришкен.
Мөөрейниң кол сорулгазы — уругларга болгаш улуг улустуң аразынга ава кижиге эң-не дээди хүн­дүткелди көргүзери болгаш ынакшылды кижизидери, өг-бүлеге, ажы-төлге, нии­ти­лелге ие кижиниң харыы­салгазын күш­телдирери, амгы үе­де эрте-бурун шаг­дан тура авага хамаа­рыштыр сагып чораан чараш ужур-чаңчылдарны диргизип, сергедип, кадагалап арттырары. 
Ол ышкаш амгы үениң аныяк-өскениниң иштики сагыш-сеткилин байлакшыдып, аваларны ыдыкшыдар чорукту чедип алыр, өг-бүлеге, нии­тилелге, дөргүл-төрелдер база салгалдар аразында харылзааны быжыктырар, чараш чүүлдерже чүткүлдү болгаш өг-бүлеге эки кижизидилгениң эге та­ваан салыр, чаа угланыышкынныг, солун чогаадык­чы дилээш­киннерни, уран чаяалганы деткиир, ава дугайында бедик деңнелдиң уран чогаалдарын, ыры-шүлүк, тураскаа­дыгларын нептередип, көвүдедир, профессионал болгаш бот-тывын­гыр ыраа­жы­лар­ның күүседикчи шынарын бедидер база ыраажылар аразында чогаадыкчы арга-дуржулга солчулгазын чедип алыр дээш, бо мөөрейни эрттирип турар.
Бо мөөрейниң суму чергези бүгү республикага Март 8 – Бүгү-делегейниң херээженнер хүнүнге тураскаадып эрттирип эгелээр. Дараазында кожуун чергениң мөөрейлери май 15-ке чедир уламчылаар. Мөөрейниң түңнелин Бүгү-делегейниң Өг-бүле хүнүнге тураскаадып эрттирер. Ол хүн В.Көк-оол аттыг Тываның национал хөгжүм-шии театрынга түңнел концертке тиилекчилерни байырлыг байдалга шаңнап-мактаар.
 

Рубрика: 

Санал-онал немээри

CAPTCHA на основе изображений
Чурукта айыттынган демдектерни киириңер.