1925 чылдың август 31-де үнүп эгелээн

АЖЫГЛАЛЧЕ КИИРГЕН

ТР-де хөй аал чурттаар бажың­нарның капитал септелге­зиниң саа­­рылгага хамаарышпас фондузу тургустунганындан бээр 3 чыл ажа берген. Фонд септелге ажылдарынга чаа технологияларны ажыглап турар.
Лопсанчап кудумчузунуң 37/2 дугаар бажыңының чурттакчыларынга октябрь 19-та өөрүшкүлүг хүн болган. Хөй каът ба­жыңның 3 подъездизинде тургускан чаа лифтилерни байырлыг байдалга ажыглалче киирген. 
Тос каът бажыңнарның лифт солуур ажылдары кайы хире чоруп турарының дугайында ТР-ниң Капитал септелге фондузунуң чиңгине директору Мерген Дагба-биле чугаалаштым. 
– Төрээн хоора­йывыстың лифтилери совет үеден эгелээш солуттунуп көрбээн. Лифт эптиг-даа болза, чурттакчыларның амы-тынынга айыылды чедирип болур транспорт хевириниң бирээзи. Россияда лифт-биле холбашкан каш-даа айыыл-халап болган. Чижээ, улуг хоорайларның бирээзи Санкт-Петербургка лифтиниң кээп дүшкени-биле 2 кижи чок болган.
Хөй аал чурттаар бажыңнарның чурттакчыларының капитал септелге дээш төлевириниң чыылдазы баштайгы чылдарда эвээш турган. 2017 чылдың түңнели-биле 2018 чылда Лопсанчап кудумчузунуң 37/2 дугаар бажыңының үш подъездиниң лифтилерин солаан бис. Ооң ниити түңү 7 сая 149 муң рубль. Тос каът бажыңның лифтилерин шынарлыг болгаш чурттакчыларның караан өөртүп турар кылдыр чараштыр кылган. Ол дээрге лифтиниң ханалары өңгүр чуруктарлыг, көрүнчүктүг, шалазын кырлыг ак демир-биле шыпкан, каъттарның дугаар­ларын базар кнопкаларын өрттенмес кылдыр тускай материал-биле кылган. Лифтилерни ажыглалга киирер бетинде шенелдезин боттарывыс эрттирдивис. 
Красноярскиниң “Еонесси” КХН-ниң бүдүрген лифтилери-биле эрги лифтилерни солаан. Тывада лифтилер солуур организация чок болганы-биле Черногорск хоорайдан “Герком” инженер-техниктиг төп ажылдарны кылып чоруткан. Компания-биле керээ чарар мурнунда республика иштинде ажылдап турар тудуг бүдүрүлгелерин киириштирериниң дугайында дугуржулганы кылган. Беш чыл иштинде лифтилерниң чедер-четпестерин эдип, ажаап-тударынга магадылалды тургузар дээш, ону чедип алдывыс. Лифтини 3 айдан 6 айга чедир солуур. “Герком” инженер-техниктиг төп-биле дугуржулга езугаар ону 2 ай кылып төндүргени ол. ТР-ниң Капитал септелге фондузунуң, “Герком” инженер-техниктиг төвүнүң болгаш “ЖЭУ-2” башкарыкчы компанияның ат салган дугуржулгазы октябрь 19-та үнүп келген. Оон аңгыда Ростеххайгааралдың хынаанының дугайында актыда ат база салдынган. Ынчангаш бо хүнден эгелээш лифтилер ажылдай берген болгаш, чурттакчыларга эптиг байдал тургустунган” – деп, ол чугаалады. 
Кызылда хөй аал чурт­таар бажың­нарда ниитизи-биле 73 лифтини тургускан турган. Оларның хөй кезииниң ажылдаар хуусаазы эрте берген. 1985 чылда Кочетов кудумчузунуң 55/2 дугаар 9 каът бажыңынга баштайгы лифтини тургускан. 25 чыл эрте бергенде, 2010 чылда септээн. Мооң мурнунда чылдарда лифтилерни көрдүнгени езугаар 25 чыл ажылдаан соон­да чаартып, ооң ажылдаар хуусаазын узадып болур турган болза, Каайлы эвилелиниң 2013 чылда күш кирген чаа техниктиг регламентизи-биле ону чүгле солуур. РФ-тиң Чуртталга Кодекизин езугаар чаа лифт садар чарыгдалдарны хөй аал чурттаар бажыңның чурттакчылары чыыр. Найысылалда 9 каът бажыңнарда тургускан эрги лифтилерни шуптузун солууру-биле 109 сая 500 муң рубль негеттинип турар. 
Лопсанчап кудумчузунуң 37/2 дугаар бажыңының чурттакчылары чаа лифтилерге шенеп олуруп, уруглар ооң өңгүр кылдыр каас­таан ханаларын сонуур­гап турган. Лифтилерни хөй чылдарда арыг-силиг тудары чурттакчыларның камныындан кол хамаар­жыр дээрзи билдингир. 
Шончалай  ХОВАЛЫГ.
Арслан  АРАКЧААНЫҢ  тырттырган чуруктары. 

Рубрика: 

Санал-онал немээри

Image CAPTCHA
Enter the characters shown in the image.