1925 чылдың август 31-де үнүп эгелээн

АРАТ ШӨЛҮНГЕ КЫПСЫР

Сибирьниң күрүнениң эмчи университединиң доозукчузу Начын Намдан кышкы универсиаданың От факелин Томскиниң кудумчуларында эккел чор.  
 
Бөгүн, декабрь 18-те, 2019 чыл­­­да Красноярск хоорайга болуп­ эртер Бүгү-делегейниң XXIX кыш­кы универсиадазының Одун ча­лаарының ёзулалы болур. 
От факелиниң тудукчулары Тываның Алдан-Маадыр аттыг музейиниң чанындан 12 шак 30 минута турда үнгеш, хоорайның тураскаалдыг черлери болур Кызыл партизаннарга тураскаал, «Азия төвү» скульптурлуг комплекс, Цеченлинг хүрээзи, Тыва үндезин культура төвүнүң чаны-биле эртерлер.
Универсиаданың Одун Кызылдың кудумчулары-биле 17 факел тудукчу­лары эккээр. Оларның аразында Тываның Баштыңы Шолбан Кара-оол, кикбоксингиге делегей чемпиону Кежик Монгуш, самбога Европаның ийи дакпыр чем­пиону, студентилер аразынга делегей чемпиону, дзюдога Пан-Америки Кубоктуң хүлер медалының эдилекчизи Альберт Монгуш, шериг албанныглар аразынга хостуг хүрешке делегейниң 3 дакпыр чемпиону, делегейниң бирги чери дээш хүрештиң тиилекчизи Начын Куулар, дзюдога Европаның бирги чери дээш маргылдааның тиилекчизи Саян Ондар, кадыы кызыгаар­лыг спортчулар аразынга ча адарынга Европа чемпионадының мөңгүн медалының эдилекчизи Руслан Очур, ТывКУ-нуң ректору Ольга Хомушку, Siberian Wellness компанияның төлээзи Игорь Гончар, «Vo_Young_возрождение» аныяктар шимчээшкининиң удуртукчузу Гульсара Сибагатуллина олар бар.
Студентилер оюнунуң От эстафе­тазының түңнел чадазы Кызылдың Арат шөлүнге 13 шакта универсиаданың одун кыпсыр ёзулал-биле доостур.
Бистиң корр.

Рубрика: 

Санал-онал немээри

CAPTCHA на основе изображений
Чурукта айыттынган демдектерни киириңер.