1925 чылдың август 31-де үнүп эгелээн

БУЯННЫГ ИШТИҢ АЖЫЛДАКЧЫЛАРЫНГА ШАҢНАЛДАР

Россияга июнь 17-де демдег­леп эрттирер байырлалының бүдүүзүнде Тываның медиктери "төгерик столдар", чыыштар чергелиг янзы-бүрү байырлыг хемчеглерни эрттиргеннер. Кызылда Тыва үндезин культура төвүнге божуп чиигээринге дузалаар албан черлериниң ажылдакчыларын шаңнап мактаарының езулалы июнь 14-те болуп эрткен. Эмчилерге, медсестраларга, акушеркаларга, санитаркаларга ТР-ниң Дээди Хуралының депутады Ульяна Монгуш, Кызыл хоорайның баштыңы Дина Оюн, мэрияның социал хөгжүлде департаментизиниң даргазы Алексей Артык-оол изиг байыр чедиргеш, шаңнал-макталдарны тывысканнар.

Кадыкшыл чокта аас-кежиктиг долу чуртталга болдунмас, ынчангаш медицина ажылдакчызының күш-ажылы кайы-даа нии­тилелге эң херектиг, хүндүлүг болуп келген болгаш болуп турар-даа. Аарыг­ кижилерни эмнээри, ажаап-тежээ­ри, амы-тынын камгалаары, иштиг-сааттыг херээженнерниң кадыкшылын хайгаа­раары, божудулга үезинде дузалажыры ышкаш буянныг үүле медиктерден бүгү талазынга ханы билиглерни, эки чаагай сагыш-сеткилди, дузааргак, экииргек хамаарылганы негээр. «Бистиң эмчилеривис шак-ла ындыг бедик мергежилдиг специалистер, кижизиг, эки мөзү-шынарлыг ажылдакчылар» деп, байыр чедирип тура, Кызыл хоорайның баштыңы Дина Оюн демдеглээн.

«Кызыл хоорайның сайзыралынга киирген үлүү дээш» деп медаль-биле уруглар невропатологу Галина Графова шаңнаткан. Ол коллегаларынга байыр чедиргеш: «Бис ажылывыска байырлаар чайывыс-даа чок болгай. Ынчангаш бо хүннерде чылыг байыр чедириишкиннерин, чымчак сөстерни, чаагай күзээшкиннерни дыңнаары дыка-ла өөрүнчүг-дүр» деп чугаалаан.

Тыва Республиканың Дээди Хуралы­ның (парламентизиниң) Хүндүлел бижиктери-биле шаңнатканнар: анестезио­лог-реаниматолог эмчи Саяна Дадаа, фельдшер-лаборант Ариза Дуктуг-Бора, акушер-гинеколог Азимаа Идам-Сюрюн, фельдшер-лаборант Рада Донгак, медсес­тра Салбакай Куулар, акушерка Анжела Монгуш, медсестра Чечек Нас-Сурун, патология салбырының эргелекчизи Аида Ооржак, акушерка Анфиса Ондар, медсестра Марина Ховалыг, акушер-гинеколог эмчи Светлана Чооду.

Кызыл хоорайның Төлээлекчилер хуралының Хүндүлел бижиин Перинаталдыг төптүң гинекология салбырының эмчи сестразы Алдынмай Оптуг-оолга тывыскан. Шак-ла ындыг шаңналга Перинаталдыг төпте чаа төрүттүнген чаштарның диагностика салбырының эмчизи Любовь Хомушку, лаборант эмчи Лариса Дамба, клиника-диагностика лабораториязының эргелекчизи Саида Ондар, анестезиолог-реаниматолог Геннадий Домбаа төлептиг болганнар.

ТР-ниң Кадык камгалал яамызының, Перинаталдыг төптүң шаңналдарын, өөрүп четтириишкин бижиктерин Перинаталдыг төптүң бөлүк ажылдакчылары алганнар. Байырлыг хуралдың киржикчилеринге хоорайның ыры-хөгжүмнүг «На­йысылал» ансамбли аян тудуп берген.

Бодунуң амыдырал-чуртталгазын эң-не буянныг, ачы-дузалыг ажылга бараалгадып чоруур медицина ажыл­дакчыларының шуптузунга изиг байырны чедирип, оларның боттарынга быжыг каң кадыкшылды, аас-кежикти, чедиишкиннерни, чаагай кежиктерни күзедивис.

  Надежда ЭРГЕП.

Рубрика: 

Санал-онал немээри

Image CAPTCHA
Enter the characters shown in the image.