1925 чылдың август 31-де үнүп эгелээн

КАМГАЛАЛ САЙЫДЫ КАДЕТ УЧИЛИЩЕДЕ

Россия Федерациязының камгалал сайыды, Россия­ның Маадыры, армия ге­не­ралы Сергей Шойгу февраль 16-да Тывага кээп чораан. Ажылчын сургакчылаашкын Президентиниң Кызыл хоорайда кадет училищезинден эге­лээн. Камгалал сайыды кадеттер-биле ужуражып, үнүп келген сарыг Ыт чылы-биле байырын чедирген.
Президентиниң Кызылда кадеттер училищезиниң начальнигиниң хүлээлгезин түр күүседип турар Уран-Кыс Мижит-Дор­жу чуңгулаар хааглыг хоккей шөлүнүң уштунар чериниң дериттингенин  көргүскен. Камгалал сайыды училищениң чыын­ды хоккей командазы-биле мендилешкениниң соонда, төп армияның спортчу клувунуң шайбазын болгаш бодунуң адын салган хок­кей ойнаар клюшкаларын байыр­лыг байдалга тывыскан. Хүндүткелдиң дем­дээн илередип, хоккейжилер белекке алган клюшкалары-биле дошту соктап, үдээн. Оон аңгыда ында дош аштап арыглаар техника база конькилерни кургадып, чидидер тускай өрээлдерни база аңгылаан. 
Дараазында уругларның өөре­нир корпузунда технология клазынга четкен. Тоску класстың уруглары боттарының чинчи-шуру болгаш кидистен ажылдарын сонуургадып көргүскен. Олар шериг хептиң каасталгазынга “Шевер удазын” деп мөөрейниң лауреаттары.  
Камгалал сайыдынга уруглар “Тыва өг-бүле” деп боттарының холу-биле кидистен кылган ажылын Шагааның белээ кылдыр сөңнээн. Күш-ажыл клазының кадет кыстары делегейниң аңгы-аңгы чурттарының аъш-чемин белеткеп өөренип алганын чугаалаан. Россияның Маадыры уругларга эки өөренирин күзеп, тыва национал чем – изиг-ханны кылып өөренип алырын чагаан.
Кадеттер Сергей Шойгуга өөрүп четтиргенин илереткеш, бедик эрге-дужаалдыг аалчызы-биле төөгүлүг чурукка тырттыржып алган. 
Камгалал сайыды Тываның күрүне университединиң шериг факультединиң студентилери-биле айтырыг-харыы хевиринге эрткен ужуражылгага киришкеш, Кызылда 55-ки тускай мото-адыгжы (даг) бригадазынга бол­гаш шериг комиссариадынга четкен.  
2016 чылда ажылчын сургакчылаашкын соонда Россияның Маадыры Шагаага турас­кааткан байырлыг шайлаашкынга хоочуннар-биле ужурашканын сагындырып каалы.
Тыва чоннуң байырлалы Шагааны демдеглеп турар онзагай хүнде бодунуң төрээн черинге Сергей Күжүгетовичиниң келгени чаңгыс чер-чурттугларынга улуг чоргаа­рал. Тывага камгалал сайыдының сур­гакчылаашкынының үезинде төп телека­налдарның журналистери база келген. 
Шончалай  ХОВАЛЫГ.
Чингис  СААЯНЫҢ  
тырттырган  чуруктары.

Рубрика: 

Санал-онал немээри

Image CAPTCHA
Enter the characters shown in the image.