1925 чылдың август 31-де үнүп эгелээн

КҮРҮНЕ ШАҢНАЛДАРЫН ТЫВЫСКАН

Май 28-те Кызылдың Улусчу чогаадылга бажыңынга Россияның Федералдыг айыыл чок чорук албанының кызыгаар эргелелиниң тургустунганындан бээр 100 чыл болган юбилейинге тураскааткан байырлыг хурал болуп эрткен. 

Ук хемчегге чүгле кызыгааржылар эвес, оларның өг-бүлелери – кадайла­ры, ажы-төлү, ада-иелери, Чазак кежигүннери, Дээди Хуралдың депутаттары, яамы, ведомстволарның төлээлери киришкен. 

«Бөгүн Россияның кызыгаар албаны албан езузу-биле үндезилеттингенден бээр 100 чылын демдеглээн. Олар боттарының айтырыы, албан-херээ, ылаңгыя заставаларда долгандыр хүрээлели-биле онзагай шериг кезээнге хамааржыр. Кызыгаар черде кезектер езулуг улуг өг-бүле апаар – солдаттар база офицерлер, кадайлары, ажы-төлү, шупту бот-боттарынга чоок, таныш. Байырлал хүннеринде бистиң Тываның кызыгаар отрядындан ону көрүп болур: өг-бүле байырлалында чыглып келген ышкаш, өөнүң ишти, уруг-дарыы шупту ында боор. Албан эрттирип турар чери, кызыгаар — шуптузунга төрээн бажыңы, олар езулуг акы-дуңмашкылар. Кызыгаар чоогунда суурларның чурттакчылары кызыгааржыларга төрелинге ышкаш, чылыг-чымчак хамаарылгазы анаа эвес. Кызыгааржылар чүгле кызыгаарны эвес, а чурттакчыларны, бистиң малчыннарывысты, араттары­высты база камгалап турар. 

Бистиң аныяктарывыстың кызыгааржылар-биле чоок харылзаазы келир үеде мергежил шилип алырынга улуг салдарны чедирип турар. Сөөлгү чылдарда, чылдан чылче, федералдыг айыыл чок чорук албанының дээди өөредилге черлерин доос­кан чаңгыс чер-чурттугларывыс Тываның кызыгаар эргелелиниң одуруунче кирип, кызыгаарда албан-хүлээлгезин күүседип чоруурлар. Кызыгаар албанының хоочуннарынга, штаттан дашкаар ажылдакчыларынга, тергиин дээн кызыгааржыларга шаңналдарны өөрүшкү-биле тыпсыр-дыр бис. Байырлалыңар-биле, өңнүктер» – деп, Тываның Баштыңы Шолбан Кара-оол ба­йыр чедирип чугаалаан. 

Тыва Республиканың Баш­тыңының чарлыы-биле, ал­бан-хүлээлгезин сыныш чок күү­сеткени дээш, прапорщик Григорий Амзараковка, улуг прапорщик Андрей Корчемкинге, прапорщик Федор Маспын-оолга Тыва Республиканың Чазааның Даргазының өөрүп четтириишкинин чарлаан. 

Подполковник Максим Пойловка, майор Александр Филатенковка ТР-ниң Чазааның Даргазының хүндүлел бижиктерин тывыскан. 

Россия Федерациязының Федералдыг айыыл чок чорук албанының Тыва Респуб­ликада кызыгаар эргелелиниң удуртукчузу Вячеслав Шкиря Тываның Баштыңы Шолбан Кара-оолду «Россияның Кызы­гаар­ шериглериниң 100 чылы» медаль-биле шаңнаан.

Рубрика: 

Санал-онал немээри

Image CAPTCHA
Enter the characters shown in the image.