1925 чылдың август 31-де үнүп эгелээн

Тана Тюлюш - Россия чемпиону

Май 23-25 хүннеринде Чуваш Республиканың найысылалы Чебоксары хоорайга 16 хар чедир назылыг уруглар аразынга Россияның бирги чери дээш хостуг хүреш  маргылдаазы болуп эрткен. Аңаа Кызыл кожууннуң Ээрбек суурундан 12 харлыг бичии спортчу Тана Тюлюш бодунуң 33 кг деңзизинге чемпион болган.

Май 28-те хемниң оң талазында Кызылче кирер оруктуң тос дугаар км-ге чемпионну, ооң-биле кады маргылдаага киржип чораан 6 уругну, ийи тренерни, Ээрбек сумунуң баштыңы Сергей Арсарыг, тус чер чагыргазының даргазы Салбакмаа Монгуш, Ээрбек школазының башкылары, өөреникчилери, Тананың авазы Ая Сарыг-оол, угбазы Отчугаш (хостуг хүрешке спорт мастеринге кандидат),чоок төрелдери, Каа-Хем суурда элээди уругларның «Авырга» спорт школазының директору Эрес-оол Ангыр-оол тренерлери-биле  кады, ТР-ниң  чыынды командаларын маргылдааларга белеткээр төвүнүң тренерлери кээп, онзагай чылыг, өөрүнчүг байдалга ак кадактыг, амданныг шайлыг уткуп алганннар.

Тананың бир дугаар барып, киришкени бо улуг маргылдааның киржикчилери кажангызындан-даа хөй болуп, маргылдаа бедик деңнелге эрткенин спортчуну белеткеп турар тренери Аржаан Сарыг-оол демдеглеп чугаалаан. Бодунуң элээди назынында мындыг улуг тиилелгени чедип алгаш, Тана Тюлюш Россияның чыынды командазының кежигүнү болган. Июнь төнчүзүнде Европаның бирги чери дээш Польшага эртер хостуг хүреш маргылдаазынга киржир спортчуларны белеткээр чыылда белеткелче ол удавас чоруптар.

Хенче-Кара Монгуш, авторнуң тырттырган чуруктары.

 

 

Рубрика: 

Санал-онал немээри

CAPTCHA на основе изображений
Чурукта айыттынган демдектерни киириңер.