1925 чылдың август 31-де үнүп эгелээн

ТИИЛЕЛГЕЖЕ ЧҮТКҮЛҮН КӨРГҮСКЕННЕР

Декабрь 3-4 хүннеринде Кызылда «Херел»  спорт залынга  хостуг  хүрешке Россияның, Европаның чемпиону, 1996 чылда АКШ-тың Атланта хоорайга болган XXVI дугаар  Олимпий оюннарынга  тыва  мөгелерден  бир дугаар киришкеш,  IV дугаар черни элээн мөге, делегей чергелиг спорт мас­тери Чечен-оол Монгуштуң чырык адынга тураскааткан III республика турниринге шупту 19 командадан 219 мөгелер киришкен. 
Маргылдааның ажыдыышкынынга ТР-ниң аныяктар  болгаш спорт сайыдының бирги оралакчызы Буян Биче-оол, ТР-ниң спортчу хүрештер феде­рациязының президентизи Радислав Наважап, мөгениң авазы Елизавета Монгуш, дуңмазы Алдынмаа Монгуш, честези Эрес Чачар-оол, өөнүң ишти Чойгана Монгуш болгаш өскелер-даа ат-сураглыг мөгениң дуга­йында чылыг  сактыышкыннарны чугаалаан.   
Мөгелер хевис кырынга ачыр-дачыр тудушканының түңнелинде 42 килге Павел Сагды (Эрзин),  46 килге Сайын Хомушку (Бии-Хем),  50 килге Аяс Монгуш (Чөөн-Хемчик),   54 килге Чаян Мон­гуш (ЦСКА-Тыва),  58 килге Анаш Апыш (Барыын-Хемчик),   63 килге Артыш Ооржак (Чөөн-Хемчик),  69 килге  Түмен Куулар (РДЮСШ),  76 килге  Дажы Куулар (ОКУ),  86 килге Лопсан Самбуу (ОКУ), 100 килге Авыраа Домбаанай (Ба­рыын-Хемчик),  120 килге Нагзат Доолай (Улуг-Хем)  чемпионнар болган.  
Шаңналдыг чер алган мөге­лерге дипломнарны, медальдарны база  10 муң, 5 муң, 3 муң рубль акша шаңналдарын тывыскан.  
Ол ышкаш тускай шаң­налдар: «Тиилелгеже чүткүл дээш» Арсланбек Борбак-оол (ОКУ), Агым Монгуш (Барыын-­Хемчик), Сергей Белчиков (Сарыг-Сеп),Чимит Кенден, Дор­жу Куулар (Чөөн-Хемчик), Ба­йыр Ондар (ЦСКА-Тыва) 3 муң  рубльди шаңналга алганнар. Кежик Седен (ОКШ) дириг хойну, «Чараш арга дээш» Аяс Монгуш, Түмен Куулар (РДЮСШ) 5 муң рубльди шаңналга алганнар. «Маргылдааның эң шыы­рак мөгези ‒ Олимпийжи бүзүрел дээш» Артыш Ооржакка (Чөөн-Хемчик) 2016 чылда Бразилияның Рио-де-Жанейро хоорайга болган Олимпий оюнннарының киржикчизи Артас Санааның шаңналы 20 муң рубльди тывыскан.
Алексей Чамбал-оол,
хостуг хүрешке  ССРЭ-ниң спорт мастери.

Рубрика: 

Санал-онал немээри

Image CAPTCHA
Enter the characters shown in the image.