1925 чылдың август 31-де үнүп эгелээн

ЭПОХАНЫҢ КИЖИЗИ

Тываның улустуң чо­гаал­чызы Юрий Кюн­зегештиң 90 хар юбилейи-биле холбаштыр чогаал байыр­лалының кежээзи Тываның национал музейинге болуп эрткен. Аңаа чогаалчының ажы-төлүнүң иези Дырбак Халбыновна Күнзегеш баштаан ооң ук-салгал уруг-дарыы, чогаалчылар, композиторлар болгаш ооң чогаадыкчы салым-чаяанының мөгейикчилери келген. 
Филология эртемнериниң доктору, Национал музейниң директору Каадыр-оол Бичелдей кежээни ажыткаш, чогаалчы Юрий Кюнзегешке, ооң чогаадыкчы ажылынга тураскааткан кежээни музейге эрттирери музейниң ажылдакчыларынга ат-алдар-дыр деп демдеглеп, ооң чогаадыкчы, редактор болгаш очулдурукчу ажылын тыва литератураның туттунуп турары баганаларның бирээзи деп үнелээн.
Кежээге келгеннер Юрий Шойдаковичиниң дугайында сактып чугаалап, ооң бижээн чогаалдарын бедии-биле үнелеп, шүлүктерин номчуп турганнар.
Чогаал сайгарыкчызы Сайлыкмаа Комбу чогаалчының тыва литератураның сайзыралынга киирген үлүүнүң дугайында чугаалап тура, Юрий Кюнзегешти эпоханың кижизи деп адаан. 
Чогаалчының чаңгыс чер-чурттуу, композитор Сергей Бадыраа Юрий Кюнзегештиң хөй шүлүктери ырлар апарганын, «Дуруяалыг төрээн черим» деп шүлүүнге үш композитор, Бегзи Каадыр-оол, Наталья Лопсан, Олег Сарыглар олар аялгалар бижээнин чугаа­лаан. Композиторнуң үделгези-биле Юрий Кюнзегештиң шүлүктеринге бижиттинген ырыларны кежээге келген аалчылар магаданчыг таалал-биле ырлашканнар.
Шаңгыр-оол Моңгуш.
Эрес Колдуң тырттырган чуруу.

Рубрика: 

Санал-онал немээри

Image CAPTCHA
Enter the characters shown in the image.