1925 чылдың август 31-де үнүп эгелээн

ЁЛКАЖЕ "АЪТТАНЫПТАР"

Декабрь 28-те  Кремльге  РФ-тиң Президентизи В.В.Путинниң даалгазы-биле Россияның булуң бүрүзүнден  келир бичии уругларга елка болур.  Тывадан  12 бичии уруглар 3 тускай үдекчилиг декабрь 23-те ынаар «аъттаныптар».

Президентиниң елказынче баар  школачылар   кожуун, республика чергелиг мөөрейлерге, маргылдааларның чаңгыс эвес удаа тиилекчилери-дир.  «Кайы-даа эртемнерниң олимпиа­даларынга киришкеш, бир-ийи ду­гаар черлер ап турдум, ынчангаш Президентиниң елказынче баар аас-кежиктиг болдум. Чогум Москва хоорайже ооң мурнунда барып турган мен» — деп, Барыын-Хемчик кожууннуң Бижиктиг-Хая ортумак школазының 6-гы клазының өөреникчизи Чаян Чадамба улуг өөрүш­кү-биле чугаалады.

ТР-ниң лицей-интернадының өөре­никчилери Евгения Шимит-оол, Оэлун Бимба, Бии-Хем кожууннуң Тарлаг ортумак школазының өөреникчизи Чаяна Кончук, Бижиктиг-Хая ортумак школазының өөреникчизи Чаян Чадамба, Р.Кенденбиль аттыг уран чүүл школазының өөреникчилери  Алдар Саая, Даяна Хомушку, Кызыл хоорайда №5 гимназия школазының өөреникчизи Айлаң Достай, Ак-Довурак хоорайның 1 дугаар школазының өөреникчилери Диана Күжүгет,  Менди Ооржак, Кызыл хоорайда кадет школазының өөреникчизи Намсарай Сараагай, Тес-Хем кожууннуң Самагалтай ортумак школазының өөреникчизи Баазанчав Натпит-оол, Кызыл хоорайның 1 ду­гаар школазының өөреникчизи Адаш Хомушку  олар 2014 чылда өөредилгеге, спортка, уран чүүлге шылгарааш, РФ-тиң Президентизиниң елказынче баар аас-кежиктиг болганнар.

Аян-чорук үезинде уругларга өс­ке-даа солун хемчеглер көрдүн­ген.«Измайлово» концерт залынга «Белка и стрелка» деп ыры-хөгжүмнүг оюн-тоглааны, «Мос­фильм» кино-студиязын, ужу­дукчуларның мемориалдыг музейин бичии уруглар  көөрлер.

Декабрь 15-те ТР-ниң өөредил­ге бол­гаш эртем сайыдының оралакчызы Владимир Монгуш шилиттинген уругларны ада-иези-биле кады келдирткеш, хуралды  эрттирген. Президентиниң елказынче баар аас-кежиктиг болганы дээш школачыларга байырын Владимир Монгуш чедиргеш, узун орукка бичии  уругларның ада-иезин солуп, кады чоруур үдекчилерни ада-иелерге, уругларга таныштырган.  ТР-ниң +өредилге болгаш эртем яамызының специализи Надежда  Тюлюш, ТР-ниң Кадык камгалал яамызының бичии уруглар эмчизи Олчанай Шоюн, полицияның инспектору, капитан  Любовь Кыжынгаа олар уругларны үдеп чоруур.

Айдың Ондар.

Санал-онал немээри

CAPTCHA на основе изображений
Чурукта айыттынган демдектерни киириңер.