Бо чайын Тываның алдарлыг эмчизи Оксана Гостюхинаның удуртканы “Серебрянка” профилакторийинге дыштандывыс. Россия Федерациязында эки ажылдыг профилакторийлерниң бирээзинге ол хамааржыр.
Аңаа бо чылдың 5 айының дургузунда 878 кижи дыштанган болду. Профилакторийниң артыы талазында дамырак кара суг агып чыдар, мурнуу талазында чайгаар үнген сад бар. Тываның 9 аңгы кожуунундан 30-ден 60 хар чедир аңгы-аңгы назы-харның кижилери хөйү-биле кадыкшылын быжыглап дыштанганнар. Оларның аразында колдуктааштарлыг, даянгыыштарлыг, коляскаларлыг кандыг кижи чок дээр.
Эскерип турарымга, хан базыышкынының турум эвес байдалындан аныяктар хөйү-биле аарып турар-дыр. Дыштаныр чон хүн бүрүде кээп турду. Санаторийде эмчилер четчир, келген кижилерни аарыының аайы-биле эмнеп турарлар.
Нерви эмчизи Тамара Шиирипей, ине-биле эмнээр терапевт Билчеймаа Достай, ток база парафин-биле эмнээр эмчилер Чойгана Хертек, Дарья Ондар, тоттурукчу-чемгерикчи, томаанныг повар кыстардан улуг повар Айдың Сундуй, оралакчызы Чойгана Чамзы, аяк чуур ажылдакчы Елена Куулар оларны онзалап демдеглевишаан, четтиргеним илередир-дир мен. “Серебрянканың” поварларының кылган чеми дендии амданныг болгаш сүүзүннүг.
Культурлуг дыштанылга удуртукчузу Урана Дүлүш бисти дыштаныкчыларны музейже экскурсияладып, агаарладып, дискотекаладып, артистерни чалап эккеп турду. Аныяк кижиниң ажылдаары-даа эки, чугаакыр-даа кижи болду. Ооң ачызында эгелекчи, идепкейжи волонтёр иелерниң солун концертин база көрдүвүс. Артистерниң идик-хевиниң чаражын канчаар. Танцылап турда кайгамчык.
Бир хүн концерт келгенин чарлапкан. Сылдыс деп аныяк артист орус, тыва ырларны дендии-ле ырлады. Ооң ырлап турар ырылары шупту чаа ырылар болду. Оларның аразындан “Авам, ачам авыралы” деп ыры сагыжымда артып калды.
Дыштанып чеде бээривиске, таныжылга кежээзи болган. Кижи бүрүзү бодунуң салым-чаяанын көргүзер дидир. Аравыстан ыраажылар-даа, самчылар-даа илереп үндү. Мен тыва улустуң кожамыктарын ырлааш, эки диртип мактаттым. Ооң түңнелинде шаажаңнар-биле шаңнаттым.
Арыг-силиг, аъштыг-чемниг, эмчилери, ажылдакчылары эвилең-ээлдек коллектив-даа онзагай-дыр. Коллективке ак орукту, аас-кежикти, чедиишкиннерни күзедим.
Чылбак МОНГУШ, күш-ажылдың хоочуну, РФ-тиң хүндүлүг башкызы.
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn