Тываның Баштыңы Владислав Ховалыг кадрлар томуйлаашкынын Аппарат хуралынга чарлаан. Республиканың тудуг сайыды Артыш Кыргысты Тыва Республиканың Чазааның Даргазының тудуг, чаагайжыдылга болгаш чуртталга-коммунал ажыл-агый сайыдының оралакчызының хүлээлгезин күүседир кылдыр томуйлаан.
Ооң-биле чергелештир ол Тыва Республиканың тудуг сайыдының албан-дужаалынга хевээр арткаш, ажылын уламчылаар.
Артыш Маадыр-оолович республиканың тудуг адырында 20 чыл ажыг ажылдап чоруур. Ол 2024 чылдың март айдан эгелеп ук адырны удуртуп келген. Ооң удуртулгазы-биле регионда социал объектилерниң тудуглары болгаш капиталдыг септелгелер чоруп, хөй-ниитиниң дыштанылга шөлдерин чаагайжыдар, муниципалдыг инфраструктураны чаартыр болгаш чуртталга бажыңнарының тудуун хөгжүдер талазы-биле төлевилелдер боттанып турар.
Артыш Кыргыс бодунуң чаа албан-дужаалынга республиканың тудуг болгаш чуртталга-коммунал ажыл-агый комплекизиниң ажылын удуртур. Ол ышкаш тудуг, чаагайжыдылга база чуртталга-коммунал ажыл-агый адырында национал төлевилелдерниң болгаш күрүне программаларының күүселдезин хайгаараар.
/ Бистиң корр.
Чурукту ТР-ниң Чазааның парлалга албанындан алган.
“Шын” №27 2026 чылдың июль 16
"Шын" солуннуң МАХ-каналынга каттыжыңар: max.ru/join/egenQ...