Рубрикалар

Тывадан башкы төрээн болгаш орус дылдарга делегей чергелиг мөөрейге тиилээн

Декабрьда Москага эрткен «Арга-дуржулгалар солчулгазы: школа өөредилгезинде этнокультурлуг угланыышкын» эртем-практиктиг конференция ажылы-биле төрээн болгаш орус дыл башкыларынга делегей чергелиг мастер-класска Тыва Республикадан башкы шылгараан. 2021 чылдың дургузунда мөөрей үш аңгы чадага эрткен. Декабрьда, түңнел чадада, Россияның субъектилеринден база ХКД чурттарындан 40 башкы киришкен, оларның бирээзи – Тываның Кызыл кожууннуң Черби школазында орус дыл болгаш литература башкызы Шеңне Викторовна Сандый болган. Мөөрейниң түңнелдери-биле «Чаартыкчы башкы» деп тускай шаңналга тыва башкы тиилээн. Мөөрейниң киржикчизи төрээн дылды башкылап тура, методиктиг арга-хевирлерни ажыглап турарын көргүзер ужурлуг. Ооң-биле чергелештир, мөөрейниң киржикчизи Россияның чоннарынга дылдарны, орус дылды өөредирде алган билиглерин төрээн дылга даянып, база орус дылдыглар орус дылды башкылаарының онзагайын көргүзер. Оон аңгыда мөөрей киржикчилери бодунуң национал хевин кедип алгаш, ооң тывылганын, чонга ужур-утказының дугайында төөгүнү таныштырар. «Мөөрейге киржилге бодумнуң профессионал арга-мергежилимни көргүзүп, мергежип-өзеримге чаа бедиктерже тепкиишти бергенинден аңгыда, ажылынга бердинген кайгамчыктыг, чогаадыкчы башкылар-биле таныштырган» — деп, Шеңне Викторовна мөөрейниң дугайында бодалын үлешкен. «Төрээн болгаш орус дыл башкыларынга делегей чергелиг мастер-класс» мөөрей 15 дугаар эрткен. Бүгү-российжи мөөрей 2019 чылдан делегей чергелиг кылдыр көдүрүлген. 2021 чылда Белоруссия, Донецк, Луганск, Казахстан, Турция, Ирак база Азербайджандан 519 башкы аңаа киришкен. РФ-тиң Президентизиниң чанында Россияның улус ажыл-агый база күрүне албанының академиязының өөредилге айтырыгларның эртем-шинчилел төвү-биле кады Төрээн, орус дыл башкыларының ассоциациязы мөөрейни организастап эрттирип турар.
 ТР-ниң Чазааның парлалга албаны
Предыдущая запись
Тываның Тудуг яамызы хөй-ниити девискээрлерин чаагайжыдар төлевилелдерни манап турар
Следующая запись
Геолог эртемденниң үнелиг номнарын алган
Меню