Рубрикалар

Өг-бүлелерде ковид хөй тарап турар

Ковид-биле демисежир оперштабтың ээлчеглиг хуралында ындыг түңнелге келген. Бажыңнарында өөренип турар уруглар аразында аарааннарның санының өскени-биле ону тайылбырлап болур.Росхереглел хайгааралының ТР-де эргелели биле Тываның Кадык камгалал яамызының медээлери-биле алырга, февраль 3-те ковидтээн 545 чаа таврылга бүрүткеттинген, ооң санында 17 хар чедир 415 уруг бар. Кызыл хоорайда эң хөй- 427 уруг аараан. Бажыңынга аарыыр чорукту соксадырда, арыг-силигни сагып, бажың-балгадын дезинфекциялаар чүүлдер-биле аштап-чуурун оперштаб сүмелээн.

Аараан улусту аргалыг болза эмнелгеге чыттырып, өскелерже халдап-нептерээрин эвээжедир. Аарыгны бажыңнарындан эккеп турар болганда, күш-ажылчы коллективтер эртенги шакта ажылдакчыларга «шүүрелдени» кылыр, ажылдаар өрээлдерни өйлеп-өйлеп аштап-чүлгүүр. ОРВИ им-демдектери бар ажылдакчыларны ажылдатпас. Ажылдаар олуттарны, эжиктер тудазын, өске-даа чүүлдерни 2 шак болгаш-ла чодар. Росхереглел хайгааралының ТР-де эргелелиниң дыңнатканы болза, Иркутскиниң чумага удур станциязынче январь 1-денбээр чоруткан 171 анализтиң 52-зинде омикрон бар болган. Коронавирустуң бо хевири бажыңнарынга тараанының бадыткалы ол. Кадык камгалал яамызы эки чүүлдер барын база демдеглээн: бөгүнде сегип-экирээн кижилерниң саны аарып турарлардан хөй — 909 кижи сегээн, 545 кижи аараан. Омикроннаан кижилер чиик кылдыр эртип, эмнээшкинни бажыңнарында ап турар. Ындыг болзажок бүдүн өг-бүлелер аарып, халдавырны өөскүткен. Кадык камгалал сайыды Анатолий Югай республикада «дельта» штамм аар эртип турарын дыңнаткан. Эмнелгелерде аар байдалдыг 123 кижи бар, 18 кижини ИВЛ аппаратта кошкан. Транспорт аймаа ам-даа чедишпезин сайыт чугаалаан. Эмнелге организацияларының база яамылар биле ведомстволарның аңгылаан машина-балгадын катай санаанындан аңгыда, ам-даа 50 хире машина херек. Ынчангаш Кадык камгалал яамызы боттары машиналарлыг чолаачыларны хөлезилээр деп шиитпирлээн. Тываның Баштыңы ковид бригадаларынга дузалажыр күзелдиг хуу чолаачыларның кывар-чаар чүүлдеринге чарыгдалын дуглап бээр даалганы ооң мурнунда бергенин сагындыраал. Тываның Баштыңының январь 31-де 40 дугаар чарлыы езугаар, өөреникчилерниң бажыңнарынга өөренири февраль 7-де доозулган. Республика школаларында өөреникчилерниң чартык кезии, азы элээдилер ортузунда аарыыр чоруктуң саны көвүдеп турарын көргеш, ырактан өөренирин ам-даа узадыр шиитпир хүлээп алдынган. Школа назыны четпээн өөредилге черлеринде дежурный бөлүктер ажылдап артар. Оперштаб санитар-эпидемиологтуг негелделерни шыңгыы сагывышаан, фитнес-кулбатарның, фитнес-залдарның база тренажер залдарның ажылдаарынга чөпшээрелди бээрин Тываның Садыг-үлетпүр палатазындан дилээн. Росхереглел хайгааралының ТР-де эргелели Тываның Баштыңынче киирген чаа саналдарында ол объектилерни каткан. Ол албан албан черлеринден аңгыда, 2022 чылда Россияның Спорт яамызының регионнар, российжи, делегей чергелиг спортчу хемчеглеринге киржир спортчуларның белеткелин катап эгелээри-биле күш-культура-кадыкшылга комплекстерин, спортчу объектилерни база автошколаларны ажылдадыр санал база кирген. ТР-де ИХЯ ОШАЧКИ тарыдып алган, аарып каапкан, ПЦР анализи анаа болган хамаатыларны транспорт башкарар эрге алырынга шылгалдаларны катап эгелээрин база саналдаан.

ТР-ниң Чазааның парлалга албаны
Предыдущая запись
ПЦР анализ хынаар чаа лаборатория ажылдап эгелээн
Следующая запись
Январь айда 5 ийис төрүттүнген
Меню