Рубрикалар

АЙЫЫЛДЫГ ВИРУСТАН КАМГАЛААР ДЭЭШ..

Республикада хамчыктыг коронавирустан аарый берген кижилерниӊ саныныӊ хенертен көвүдээни-биле, Чазак деӊнелинге болур-чогуур хемчеглерни хүлээп алган дээрзин Тываныӊ Баштыӊы Владислав Ховалыг социал четкилерде хууда арнынга бижээн:

«Чүгле неделя иштинде COVID-19-тан аараан улустуӊ саны 20-ден 200 чеде берген. Дүвүренчиг сан-чурагай-дыр! COVID-19-туӊ тараарынга удур демисежири-биле, республиканыӊ Чазааныӊ курлавыр фондузундан 43 ажыг млн. рубльди үндүрдүм:

⚡Эм-таӊны болгаш SARS-CoV-2 деп антигенни илередир реагентилерни немей садып алырынга — 40 ажыг млн рубльди;
⚡Росрезервтен Тывага үндүрүп берген 250 муӊ янзы-бүрү антисептиктерни бээр эккээринге — 2,5 хире млн. рубльди;
⚡Бирги ээлчегде ол чүүл республиканыӊ социал албан черлеринге херек.
⚡Эмчилер чеди хонук дургузунда 24 шак иштинде ажылдаар чурум-биле чоруп турар, оларга волонтерлар дузалажып кирипкен, шупту күштерни мөөӊнештирген.
⚡Республикада аарымзырай берген чурттакчы бүрүзү эмчиниӊ мергежилдиг дузазын алыры чугула. Ниитизи-биле бистер кандыг-даа байдалга белен турар ужурлуг бис: Поликлиникаларда дарый эмчи дузазы хүннүӊ-не 8.00 шактан 20.00 шакка чедир дыштаныр хүн чок ажылдап турар.
⚡Дүрген эмчи дузазы чедирер 36 бригада хондур ажылдап турар, ооӊ мурнунда дег, өске организацияларныӊ транспортун хаара туткаш, оларныӊ санын 40 чедир көвүдедиринге белен бис.
⚡Call-төптерде волонтер эмчилер ажылдап турар, 122 дугаар-биле хүлээр черлерниӊ санын 12 чедир көвүдеткен. Медицинаныӊ дээди эртем өөредир албан черлериниӊ студентилери – 86 ординатор эмчилер удавас каттыжып келир.
⚡Тестированиени, ооӊ иштинде 9000 ажыг экспресс-тестилер-биле хынаар ажылды шуудадып турар бис. Бистиӊ лабораторияларывыста хүннүӊ-не 4800 ажыг анализтерни шинчилеп турар.
⚡Лабораторлуг шинчилелдерни эрттиреринге 200 муӊ тест-системаларны немей садып ап тур бис.
⚡Беш улуг эмнелгеде 11 кислород станциязын кылган, өске эмнелгелерни 269 кислород концентраторлары-биле чепсеглээн. 509 кислород баллоннары -курлавырда. Медицинаныӊ газ тургузуглуг кислородун немей эккелдирери-биле, Тываныӊ кадык камгалал яамызы керээлерни чарып турар.
⚡Кызылдыӊ аӊгы-аӊгы черлеринде – Солагай эрик дачаларында кезээнде, Восток микрорайонда, МЖК болгаш хоорайныӊ төп кезээнде вакцинация пунктуларын немей ажыткан.

Байдалды кичээнгейлиг өөренип көрүп турар бис. Кадык камгалал яамызы биле Росхерегхайгаарал шупту улусту айыылдыг вирустан камгалаар дээш арга-хемчеглерни кылып чорудуп турар. Оперштаб ажылды күштелдирген.

Ылаӊгыя «омикрон» деп чаа хевири, дыка дүрген тарап турар болганда, кижи бүрүзү аарый берип болур дээрзин уттуп болбас.

Шупту хемчеглерни сагыырыӊарны, вакцинация болгаш ревакцинацияны утпайн салдырып алырыӊарны силерден дилеп тур мен!»

Кадыкшыл – бистиӊ холувуста болганда, кудумчуга болгаш хөй кижилер турар албан черлеринге үргүлчү маска кедип, социал дистанцияны сагыыры, үнген-киргенде, холун арыдыр чуп, антисептик-биле арыглаары эӊ эки камгалал дээрзин эмчилер база катап сагындырган.

Р. ДЕМЧИК белеткээн.

Предыдущая запись
ЛАБОРАТОРИЯЛАР ХОНДУР АЖЫЛДААР РЕЖИМЧЕ КИРГЕН
Следующая запись
САЙЫТ-БИЛЕ ДОРТ ЭФИР
Меню