Рубрикалар

ЧАЛДАНМАЙН ШИИТПИРЛЕП КИРИПКЕН

Тыва Республиканың Баштыңы Владислав Ховалыг январь 6-да Чазак бажыңынга өске регионнарда ажылдап, чурттап чоруур чаңгыс чер-чурттугларывыс-биле ужуражып, оларның-биле ажыл-амыдырал дугайында ажык чугааны кылган. Ол дугайында Владислав Товарищтайович социал четкилерде бодунуң арынынга дыңнаткан.

Чаа чыл таварыштыр узун дыштаныр хүннерде чанып келген чаңгыс чер-чурттугларывыс-биле ажык чугаа соонда, өске регионнарда ажылдап, чурттап чоруур специалистер болгаш өөренип, эртем-билиг чедип ап турар сургуулдар-биле чазак даргазы интернет четкизин таварыштыр дүүн, январь 8-те база катап ужурашкан.

Барык 3 шак чедир болган ажык чугаага 100 ажыг кижи киришкен. «Шын» солуннуң төлээзи zoom-конференция байдалынга эрткен ужуражылгага баш бурунгаар бүрүткедип алгаш, эгезинден төнчүзүнге чедир олурушкан.

Россияның чөөн талазындан эң кыдыкы региону — Чукоткадан эгелээш, Москва, Санкт-Петербург чедир ажылдап, чурттап чоруур чаңгыс чер-чурттугларывыс-биле ТР-ниң Баштыңы Владислав Ховалыгның ажык чугаазының видео-бижиин ооң социал четкилерде арынында кандыг-даа кызырылга чок салып каан.

«Өөредилге болгаш кадык-камгалал адырларының специалистери өскээр чоруп турарының дугайында доктаамал чугаалап турар-даа болзувусса, байдалды долузу-биле билбес турган бис» — деп, Владислав Товарищтайович ажыы-биле айыткан. «Республикадан дыка хөй улус өскээр чоруп турар болганда, шиитпирлеттинмээн айтырыглар бар болганы ол-дур. Ынчангаш ооң чылдагаанын тодарадып билип алыры чугула» — деп, чазак даргазы демдеглеп турар.

Соңгаар ажылдап, чурттап чоруур чаңгыс чер-чурттугларывыс чүгле чедер-четпес айтырыглар көдүрүп турар эвес, оларны шиитпирлээр арга-шинээн саналдап турарынга таарзынганын Владислав Ховалыг онзалап айыткан.

Болуп эрткен ужуражылга дугайында долу репортажты «Шын» солуннуң дараазында үндүрүлгезинде (январь 12-де үнер) парлаар.

Россия Федерациязының Президентизи Владимир Путинниң шилилгези-биле эрткен чылдың апрель 7-де Тыва Республиканың Баштыңының эрге-хүлээлгезин түр када күүседир кылдыр томуйлаткаш, сентябрь айда бүгү Тываның соңгукчуларының деткимчезин ап, соңгулдаларда бүзүрелдии-биле тиилээн Владислав Ховалыг чоннуң эң бергедеп турган одаар чүүл — хөмүр өртээ биле электри хандырылгазының дугайында айтырыгларны федералдыг деңнелге чедип тургаш чедиишкинниг шиитпирлээнин билир бис.

ТР-ниң Баштыңы-Чазак даргазы В.Т.Ховалыг ам бо чаа, 2022 чыл үнгелекте республиканың ам база бир эң берге айтырыгларының бирээзи — тускай эртемниг специалистерниң, ылаңгыя эмчилерниң болгаш башкыларның, республикадан дашкаар чоруп турарын канчап соксадырыл, соңгаар чоруй барган улузувусту канчап дедир Тываже эгидерил деп айтырыгдан чалданмайн шиитпирлеп эгелээни — РФ-тиң Президентизи В.В.Путин Владислав Ховалыгның кандидатуразын эрткен чазын шилип алганы кончуг шын болган деп база катап бадыткап турар.

Мерген КЫРГЫС.

Предыдущая запись
Следующая запись
ЭМЧИЛЕРГЕ БИР САЯ РУБЛЬДИ ТӨЛЭЭР
Меню