Рубрикалар

ДЕМНЕЖИР, ДУЗАЛАЖЫР, КАДЫЫН КАМНААР

Республикада эпидемиологтуг байдалдыӊ нарыыдап келгени-биле, Тываныӊ Чазаа болур-чогуур хемчеглерни дарый шиитпирлеп турар. Ол дугайында Тываныӊ Баштыӊы Владислав Ховалыг социал четкиде арнынга бижээн:

«Келген дораан-на COVID-19 талазы-биле оперативтиг штабтыӊ хуралын эрттирдим. Байдал хүнден хүнче дүшкүүрленип турар. Херек апаар болза, аарыг улус чыттырар орун фондузунуӊ объектилеринге, ол дээрге «Автомобилист», «Сүбедей», И. Ярыгин аттыг спорткомплекстерге, мээӊ даалгам-биле хыналданы чоруткан. Амбулаторлуг эмнээшкинде турар аарыг улуска херек эм-таӊны садып, кислород хандырылгазыныӊ күчү-күжүн быжыглап тур бис.

Бир хүнде колл-төвүнче 4000 чедир долгап кээп турар, операторларныӊ санын дарый көвүдедир херек. «122» изиг шугумнуӊ каналын немей ажыдарын, ол ажылга администрацияныӊ, яамыларныӊ болгаш ведомстволарныӊ ажылдакчыларын хаара тударын Чазак аппарадынга дагзып кагдым. Улус боттарыныӊ айтырыынга харыыны ол үезинде алыр ужурлуг.

Автоволонтерларныӊ кывар-чаар материалыныӊ өртээниӊ орнун төлеп бээр даалганы бердим. Бажыӊында эмнедип турар улуска эмчилер медикаментилер чедирип четтикпейн турар.

Сагыш човангыр улусту бо ажыл-херекке каттыжып, бистиӊ эмчилеривиске дузалажырын дилеп тур мен!

Сайгарлыкчылар кымдан-даа артык когарап шүүдеп турарын билир бис, ынчангаш чогуур хемчеглерни ажылдап кылып турар бис. Чараштаныр салоннарныӊ, массаж салоннарыныӊ, парикмахерскаяларныӊ, бассейннер болгаш сауналарныӊ ажылын арай эртежик соксадыпкан-дыр бис деп бодалывыс дүүшкек болду.

Олар ажылдаар чериниӊ 25-50 хуузун долдуруп, улусту баш бурунгаар бижидилге-биле хүлээп, катап ажылдап болур деп шиитпирледивис.

Сайгарлыкчыларны деткиири-биле, ажылчын бүрүзүнге хамаарыштыр ажыл төлевириниӊ эӊ адаккы хемчээли болур акша-хөреӊгини үндүрүп бээр бис.

Эӊ кол чүүл – вирустуӊ тараарын эвээжедип, кижилерниӊ кадыкшылын камгалаары. «Гаруда», «Норзин» садыг төптеринге, Чонну ажылга хаара тудар төптерге чаа вакцинация пунктуларын ажыдар бис.

Бис, кижи бүрүзү шупту, санитарлыг негелделерни сагып, тарыдып алыры амыдыралга чугула дээрзин чаӊгыс эвес катап чугаалаан мен, ам база чугаалап тур мен»

Р. ДЕМЧИК очулдурган.

#ОперативтигШтаб #Эпидбайдал #ТываныңБаштыңы #Тыва #Тува #Шынсолун #Тывадыл #Тывамедээ #Tuva #Shyntuva

Предыдущая запись
“ОМИКРОНГА” ЧЕРЛЕ АЛЫСПААЛЫ!
Следующая запись
ШАГАА БАЙЫРЛАЛЫНЫҢ ПРОГРАММАЗЫ
Меню