Рубрикалар

ЭРГИ ЧУРУК

Бо эрги чурукту көрүп кааш, ынчангы студент чораан эш-өөрүмнү сактып, ажы-төлдери сонуургап көөрлер боор деп бодал-биле чоруттум. Чуруктуң артында «Кызыл. Азияның төвү. 1965 чыл» деп бижээн. Ынчан бо чурукту май байырлалдарынга уткуштур «Шын» солунга үндүрген. Чурукту ынчан «Шын» солун редакциязынга ажылдап турган акым Окан-оол Намчылак үндүрген чүве.

Ол үеде Кызыл хоорай амгы дег сайзыраңгай эвес турган. Студентилер столоваязындан дөгере барып чемненир, таныжар, билчир турган бис.

Ынчангы чалыы үевисте деңге өөренип, хөй-ниити ажылдарынга киржип чораан эш-өөрүмнүң дугайын солун-сеткүүлдер, радио-телевидениеден дыңнап, көрүп, номчуп, танып чоруур-ла-дыр мен.

Бо чурукта оолдар, кыстар Тывазының сайзыралынга улуг үлүг-хуузун чедип алган эртем-билии­биле киириштиргеш, амгы үеде назы-хары улгадып, чамдыктары өске оранче чоруткулаан, өскелери уругларының ажы-төлүн карактажып-даа чоруурлар болгай бис.

Чурукта көдээ ажыл-агый техникумунуң сургуулу турган Фаина Артынаның юбилейинде байыр чеди­риишкинин бо чазын көрдүм. Дыка самнап-танцылаар уруг болгай ынчан. А Валентин Куулар ынчан-на шыырак мөге, колхоз-совхозтарга директорлап, удуртукчу дарга турду. Галина Куркова дендии активчи турган. Ол техникумнуң бүгү хөй-ниити ажылдарынга идепкейлиг киржир, «лидер» уруг чораан. Эмчи училищезиниң сургуулдары Кутовский биле мен дооскаш, черле ужурашпаан бис. Амыдырал аайы-биле кижи каяа-даа чурттаар апаар чүве ышкажыл. Совет Эвилелиниң делгемнеринче тарай бергилээн бис. Оларның шуптузу-биле ужурашпаза-даа, дыңнап, билип чоруур мен.

Бо чурукта Очур-Хөө Эртинениң дугайын бо-ла номчуп, дыңнап чоруур мен. Уруу башкы, чогаалчы Урана Эртинениң бижээн чүүлдерин дыка сонуургап номчуур мен.

Бодум эмчи училищезин дооскаш, кадык камгалал шугумунга 46 чыл бараан болуп, ажыл-ижимге үнелелди алган мен. «ТР-ниң кадык камгалалының алдарлыг ажылдакчызы» деп бедик атты алганымга чоргаарланып чоруур мен.

Чаа үнүп орар 2022 чылды уткуй Тывада ажылдап-чурттап чоруур эш-өөрүмге байырым чедирип, өг-бүлелеринге аас-кежикти, кадыкшылды күзеп артым.

К. К. БУЯНХӨӨ (КОШКАР-ООЛ).

Торгалыг суур

Предыдущая запись
УЛУГ ӨГБЕМ — МИХАИЛ НОРДУП-ООЛ
Следующая запись
ТЫВАНЫҢ БАШТЫҢЫ ДЭЭДИ ХУРАЛДЫҢ ДЕПУТАТТАРЫНГА АЙЫТКАЛЫН БЭЭР
Меню