Рубрикалар

КОЧЕТОВ – ТЫВА КҮРҮНЕНИҢ КАВАЙЫ

Тыва Арат Республиканың 100 чылынга тураскааткан байырлал хемчеглери республиканың хоорай суурларында эртип турар. Бөгүн, август 13-те, Таңды кожууннуң Кочетов суурда мемориал комплекске чечектер салырының ёзулалы болган.

Кочетов суурнуң туттунган чери Суг-Бажынга 1921 чылдың август 13 – 16 хүннерде бүгү Тываның тос кожууннарының болгаш орус чурттакчы чоннуң төлээлериниң шуулганынга Тыва Арат Республика күрүнениң тургустунганын чарлаан. Ол шуулганга чаа тургустунган тыва күрүнениң үндезин хоойлузу Конституцияны хүлээп алган.

Тыва Арат Республиканың 100 чылынга тураскаадып, Кочетов суурда мемориал комплекске айыраң чараш өңнүг чечектерни Тываның Баштыныңың албан-хүлээлгезин түр үеде күүседип турар Владислав Ховалыг, күш-ажылдың хоочуннары, республиканың эрге-чагырга органнарының удуртукчулары байырлыг байдалга салганнар.

“Тыва Арат Республиканың 100 чылынга тураскааткан байырлыг хемчеглер Суг-Бажы деп черде Кочетов суурда эгелээни таварылга эвес. Чүге дээрге маңаа Тываның салым-чолунга төөгүлүг ужур-дузалыг болуушкун болуп, ону Моңгуш Буян-Бадыргы, Иннокентий Сафьянов, Ажыкай Оюн дээн ышкаш шылгараңгай кижилер баштап турган. Кочетов суур Тыва күрүнениң кавайы-дыр” – деп, Владислав Ховалыг демдеглээш, чыылган чонга улуг юбилей-биле байырны чедирген.

“Тыва Арат Республиканың баштайгы Конституциязын 1921 чылда Суг-Бажынга улуг шуулганга хүлээп алганындан аныяк тыва күрүнениң парламентаризминиң тургустунуушкуну эгелээн. Тыва парламентаризм бо чылын 100 чыл юбилейин демдеглеп турар” – деп, Тыва Республиканың Дээди Хуралының даргазы Каң-оол Даваа чугаалаан.

Байырлыг хемчегниң киржикчилери Кочетов суурда юбилейлиг чылда чаарттынган төөгү-мемориалдыг комплексти кезип көргеннер.

   

#Кочетовсуур #Төөгү #ТАР_ның100чылы #Тыва #Тува #Тувамедиагрупп #Тывадыл #Тывамедээ #Tuva #Shyntuva

Предыдущая запись
БУЯН-БАДЫРГЫНЫҢ ТУРАСКААЛЫНГА…
Следующая запись
ТАР-ның 100 чылдаанынга: ТЫВАНЫҢ БАШТАЙГЫ КОНСТИТУЦИЯЗЫ
Меню