Рубрикалар

«КЫЗЫЛ ЗОНАДА» УЕ-ЧОВУУР, ХИЛИНЧЕК

Тывада COVID-19 халдавырлыг аарыгның байдалы нарыыдап келген. Июль 13-түң саны-чурагайы-биле алырга, чаңгыс хонук дургузунда 170 кижиниң COVID-19-тан аарый бергени илерээн. 2021 чылдың эгезинде бо хамчык аарыгны аараан соонда, чок болган улусту санаваска, 35 кижи ковидтен аарааш чок апарган. 21-ги чүс чылдың хамчык аарыының үезинде Кызыл хоорайның хөй ажыл-чорудулгалыг эмнелгезиниң «кызыл зонада» чүү болуп турарын Тува-24 телеканалдың корреспонтентизи Сайгын Бюрбю тырттырар бөлүк-биле барып көрген.

Ук эмнелгениң эргинин артап четикпээнде-ле, аарыг улустуң уе-човууру, хилинчек човулаңы дыңналып келген. Амгы үеде бо эмнелгеде 700 аарыг кижи чыдар. Оларның 32-зи реанимацияда, а 18 кижи ИВЛ аппаратта коштунган.

Эмнелгениң кол эмчизи Анна Сарыглар:
— Бо аарыг дыка айыылдыг болуп турар. Чүге дээрге чүгле өкпени эвес, а хан-дамырга, бүүректерге, баарга база кончуг багай хораны чедирер. Чамдык улус аарыгны чиик, а бир чамдыызы аар, берге байдалга эртип турар – деп, чугаалаан.

Аарыгның 1 болгаш 2 дугаар «чалгыы» чүгээр турган. Чүге дээрге ынчан шыңгыы хемчеглер чоруттунган. Баштайгы ийи чалгыгдан ылгалып турар чүүл болза, бо удаада 16 харга чедир чаштар болгаш аныяктар хөйү-биле аарып турар.

COVID-19 шынап-ла, өскерлип турар. Чүге дээрге делегейде индий, бразиль, британ штаммнары база тывылган. Ынчалза-даа Россияның вакциназы вирустуң ол штаммнарынга удур туржуптар, ол хире күштүг деп специалистер санап турар.

«Лунсинде» ажылдап турар 37 харлыг кыдат хамааты бо хүнде берге байдалда. Хамааты иштинге доңгайтыр чыдып алырга, хөрээн бичии бедидир адаанче сыртык суп бээрге, кезек үеде арывайн барган ышкаш боор. Ол боду тынып шыдавас, ынчангаш үргүлчү кислород кожуп каан чыдар дээрзин медицина ажылдакчызы дыңнаткан.

Ук эмнелгеде аарып чыдар улустуң хөй кезии куда-дой, юбилей, хылбык-дой дээн ышкаш байырлалдар барган соонда аараан. Кижи бүрүзүнүң организми аңгы. Ынчангаш кижи бүрүзүнге аарыгның бир дугаар им-демдектери аңгы-аңгы кылдыр илерээр. Анаа грипп-биле дөмей аарый берген улус эгезинде билбейн баар.

Эмнедип чыдар кижи:

— Хенертен чөдүртүп, эъдим изип эгелээн. Дораан дүрген дуза эмчилеринче долгапкан мен. Аарый берген болдум. Чаңгыс чер-чурттугларым, кевин-херекчок черге хөй улус чыылган черлерже барбайн көрүңер! Эң-не кол чүве, вакцинадан салдырып, тарыдып алырынче кыйгырдым!

«Кызыл зонада» ажылдап турар эмчилер шупту вирус эрттирбес тускай хептерлиг боор. Олар бо изигде ол хепти 8 шак иштинде ужулбас.

Росхереглелхайгааралдың кол санитар эмчизи Людмила Салчактың чугаазы-биле алырга, эмчилерниң халдавырлыг аарыг-биле дүн-хүн чокка тулчуп, күженниишкинниг ажылдап турары орулга ажылдап алыр дээн хууда сайгарлыкчыларга чүү-даа эвес апарган. Хууда сайгарлыкчылар орулга ажылдап алыр дээш, чоннуң кадыкшылын кончуг улуг айыылче чыгадып турар. Шак мындыг бодамча чок чоруктар локдаунга (карантинге) чедирип болур.

#Коронавирус #Кызылзона #Эпидбайдал #Тыва #Тува #Тувамедиагрупп #Тывадыл #Тывамедээ #Tuva #Shyntuva

Предыдущая запись
КЕЗЭЭ МӨҢГЕДЕ КОЖАЛАР БИС
Следующая запись
ТЫВАНЫҢ ЦЕМЕНТ ЗАВОДУНУҢ ТӨӨГҮЗҮНДЕН
Меню