2026 чылдың эгезинден тура Россияның Социал фондузунуң Тыва Республикада салбыры бичии уруглар азырап алган өг-бүлелерге деткимче көргүзери-биле 8 сая ажыг рубльди аңгылаан.
Чаңгыс катап алыр ындыг деткимчени уругну азырап алган, ол ышкаш кижизидип өстүрер, ажаап-тежээр дээш алган өг-бүле ап болур. Россияның Социал фондузунуң ТР-де салбыры ол сорулганы хандырары-биле чыл эгезинден тура Тываның 112 өг-бүлезинге 8 сая 814 муң рубльди чоруткан.
Чаңгыс удааның төлевирин Россияда доктаамал чурттап турар хамаатыларга бээр. Төлевир доктааткан хемчээлдиг. Тывага 2026 чылда ооң хемчээли — 39 830,63 рубль. Кыдыкы Соңгу чүкке хамааржыр кожууннар (Тожу, Мөңгүн-Тайга кожууннар, Тере-Хөл кожууннуң Шынаа сумузу) — 42 675,68 рубль.
Бир эвес өг-бүле хары угда элээн каш уругну кижизидилгеге алган болза, уруг бүрүзүнге төлевир көрдүнген. Инвалид уруглар азырап алган өг-бүлелерге, 7 хардан өрү назылыг азы кады төрээн алышкы-угбашкыларның төлевириниң хемчээли 304 338,41 рубль, Кыдыкы Соңгу чүкке хамааржыр кожууннарга (Тожу, Мөңгүн-Тайга кожууннар, Тере-Хөл кожууннуң Шынаа сумузу) — 326 076,87 рубль.
Чаңгыс катап алыр төлевирни алырда Күрүне ачы-дуза порталы, Хөй угланыышкынныг төп таварыштыр билдириишкин киирери эргежок чугула азы Россияның Социал фондузунуң ТР-де салбырының клиентилер албанынче баар. Билдириишкин киирер кижиге уругну азырап алганының дугайында судтуң шиитпириниң, ажаап-тежээр уругну дамчытканының дугайында администрацияның шиитпириниң азы азырап алыр өг-бүлеге тургусканының дугайында шиитпирниң хоолгазы херек. Арткан документилерни специалистер боттары ведомстволар аразының кады ажылдажылгазы-биле негеп алыр.
«Документилер хүлээри хуусаалыг дээрзин сагындырып тур бис» – деп, Россияның Социал фондузунуң ТР-де салбырының удуртукчузунуң оралакчызы Урана Монгуш дыңнаткан. Билдириишкинни азырап алырының дугайында судтуң шиитпири күш кирген соонда, азы ажаалда-тежээлде органының шиитпири, азы уругну өг-бүлеге хүлээп алганының дугайында керээни чарган соонда, 6 ай дургузунда киирген турар ужурлуг.
Билдириишкинни киирген хүнден тура 10 ажыл хүнүнде төлевирни бээриниң дугайында шиитпирни тургузар. Чугула документилер азы медээлер чогундан хуусаазын 20 ажыл хүнүнге чедир узадып болур. Төлевир акшазын шиитпирни хүлээген хүнден тура 5 ажыл хүнүнүң дургузунда төлээр.
Айтырыглар бар болза, Россияның Социал төвүнүң (СФР) чаңгыс аай контакт-төвүнче долгаар — 8-800-100-001. Регионалдыг шугумнуң ажылдаар чуруму — понедельниктен четвергке чедир 9.00–18.00 шакка чедир, пятницада — 9.00–16.00 шакка чедир.
/ А. СОЯН белеткээн.
Медээни Россияның Социал фондузунуң ТР-де салбырындан алган.
Чурукту Шедеврумга чураан.
Шын №30 2026 чылдың август 5
"Шын" солуннуң МАХ-каналынга каттыжыңар: max.ru/channel_shyn