Тыва Республиканың Кадык камгалал яамызынга «Кадык амыдыралче орук» губернатор төлевилелиниң 2025 чылда түңнелдерин үндүрген. Төлевилелдиң күүселдези-биле эмчи ажылдакчылары республиканың 13 кожуунунче 50 үнүүшкүннү кылган. Ниитизи-биле аарыгларны эртежик илередир, чоннуң кадыын экижидеринче угланган 12 533 эмчи шинчилгезин чоруткан.
Эмчи шинчилгезиниң түңнелдерин сайгарып көөрге, хан эргилдезиниң аарыглары республиканың чурттакчыларының аразында эң нептереңгей болуп, илереттинген шупту аарыгларның 43 хуузун тургузуп турар. Карак болгаш иштики бестер аарыглары – ийиги черде. Илереттинген аарыгларның аразында кулак, думчук аарыглары – үшкү черде.
Үнүүшкүннер аразындан 8080 диагностиктиг шинчилгелерни чоруткан. Оларның аразында 2779 херээжен кижиге маммографияны кылган, 216 кижиге аарыгны илереткен. 3131 аарыг кижиге рентгенни эрттирген. Ооң иштинде 36 кижиниң аарыын тодараткан. 1695 аарыг кижиге УЗИ-ни кылып, баш мээзинче, моюнче, холдарже чораан дамырларны, ижин-шөйүндүнү, бүүректерни, боостаа безин болгаш буттар дамырларын хынаан. Ол ышкаш эндоскоптуг шинчилелдерни база кылган.
Көжүп чоруур эмчи-акушер пунктуларынга үнүүшкүннер үезинде гинеколог эмчи 587 херээжен кижини хынаан, оларның 382-зиниң аарыгларын илереткен. Илереттинген аарыглар аразындан ыжык аарыглары эң нептереңгей болган.
«Кадык амыдыралче орук» деп губернатор төлевилелин Тываның Баштыңы Владислав Ховалыг 2025 чылдың январьда бодунуң Айыткалынга эгелээн деп чарлаан. Ук төлевилел республиканың девискээринге 10 чыл дургузунда чедиишкинниг боттанып келген «Кадыкшыл маршруду» төлевилелдиң салгакчызы апарган. Уругларның кадыкшылын хынаар угланыышкын чаа эгелээшкинниң бир кезээ болуп, бот-тускайлаң төлевилел кылдыр ажылдап турар.
Владислав Ховалыг ук эгелээшкиннерни чарлап тура, регионнуң чурттакчы чонунуң кадыкшылын экижидеринге идиг болуру-биле аарыгны эртежик тодараткаш, эмнээр, катап тургустунар хемчеглерже кичээнгейни угландырып, онзалап демдеглээн.
ТР-ниң Чазааның парлалга албаны.
“Шын №2 2025 чылдың январь 22