Чурттуң Президентизиниң мурнады көөр сорулгаларының бирээзи — республиканың хамаатыларының чурттаар оран-сава байдалын экижидери деп, Тываның Баштыңы Владислав Ховалыг бодунуң блогунга демдеглээн. Салдынган сорулгаларны чедип алырынга Тыва бо чылын федералдыг деткимчени алган база 2 хуу чиигелделиг регионалдыг ипотека программазын эгелээн. Ол ышкаш республика өске-даа күрүне программаларынга киржирин уламчылап турар, чижээлээрге, «Аныяк өг-бүлелерни чурттаар оран-сава-биле хандырары».
Губернаторнуң чугаазы-биле алырга, бо угланыышкын-биле бо чылын 178 сая ажыг рубльди аңгылаан. Ооң ачызында 137 аныяк өг-бүле херечилелдерни алган. Ол ышкаш чурттаар оран-сава садып азы тудуп алган чарыгдалының кезээн социал төлевирлер-биле дуглап болур дээрзин ол демдеглээн.
Оон аңгыда, республиканың Тудуг яамызы болгаш муниципалитеттер киржикчилерге программаның боттаныышкынының ажык-чарлыын хандырары чугула, а кордакчылар субсидия алыр оочурун база хуусаазын эки билир турар ужурлуг. Тус черниң эрге-чагыргалары боттарының талазындан төлевилелдиң боттанылгазының дугайында үргүлчү дыңнадыр, чаңгыс чер чурттугларының бо тема талазы-биле айтырыгларынга үезинде болгаш оперативтиг харыылаар ужурлуг деп, Владислав Ховалыг айыткан.
«Келир чылын база бо программа уламчылаар. Сертификаттарны ам-даа 100 ажыг киржикчиге бээр деп санап турар бис. 13 чыл дургузунда Тывага чурттаар оран-сава садып алырынга социал төлевирни 2154 өг-бүле алган» — деп, Владислав Ховалыг демдеглээн.
Бистиң корр.
«Шын» №93 2023 чылдың декабрь 6