Республиканың Баштыңы Владислав Ховалыгның удуртуп эрттиргени Аппарат хуралынга уругларның чайгы кадыкшылга кампаниязының баш бурунгаар түңнелдерин үндүрген.
Тываның өөредилге сайыдының хүлээлгезин күүседип турар Орлан Соянның дыңнатканы-биле алырга, 18706 уругну дыштанылгаже хаара туткан. Чайгы дыштанылга үезинде уругларны 168, ооң иштинде 21 стационарлыг, 145 хүндүскү база 2 майгыннарлыг лагерьлер хүлээп алган. Чай дургузунда 17,6 муң уруг аңаа дыштанган. “Артек”, “Океан”, “Смена”, “Орлёнок” база “Алые паруса” федералдыг лагерьлерге 92 уруг дыштанган. Аңгы-аңгы аарыгларлыг 1019 уругну тускай путёвкалар-биле чурттуң санаторийлеринче болгаш курорттарынче чоруткан.
Дыка хөй чылдар дургузунда септелге чок турган дыштанылга лагерьлерин чаартыр талазы-биле улуг ажылдар бо чылын кылдынганын республика Баштыңы демдеглээн. Владислав Ховалыг лагерьлер оран-саваларының болгаш тудугларының айыыл чок чоруу стандарттарга дүгжүп турарын онза кичээнгейлиг хынаарын, ол ышкаш дыштанылга кампаниязын организастаанының шынарын сайгарып көөрүн дааскан.
«Хыналда-хайгаарал органнарының илереткен четпестерин чайладыр улуг ажыл манап турар – деп демдеглээн. – Уругларның айыыл чок чоруун, чайгы дыштанылгазын база хостуг үезин бедик деңнелге организастаары чугула».
Илереттинген хажыдыышкыннарны чайладыр хемчеглерни ведомстволар аразының комиссия күжү-биле октябрь 1-ге чедир ажылдап кылырын Чазак Даргазының оралакчызы Орлан Сарыгларга дааскан.
ТР-ниң Чазааның Парлалга албанының медээзи болгаш чуруу.
“Шын” №36 2025 чылдың сентябрь 18