Сооктар дүжерге, найысылалдың кудумчуларында хөй-ниити транспорт, пассажирлер сөөртүлгези дээн ышкаш айтырыглар чидигленип-ле эгелээр. Республиканың хөй-ниити транспорт айтырыгларын шиитпирлээри — найысылал Кызылдың мэриязының мурнады көөр сорулгаларының бирээзи. Амгы үеде хоорай чурттакчыларын аргыштырар транспорт график езугаар штаттыг чурумда ажылдап турар.
— Хоорайның Вавилин ээтпээнче хүннүң-не 6 автобус үнүп турар. Ол ышкаш 18, 25, 15а, 5а, болгаш 2а маршруттарда чиигелделиг автобустар база бар. 2а маршруттан өске автобустар ийи-ийилеп халып турар. 13 дугаар маршрутче хуу автобустар-биле кады хүнде 5–6 автобус үнүп турар — деп, «Автоколонна 17» КХН-ниң кол диспетчери Айсуу Ондар чугаалаан.
Кандыг-даа техника-биле дөмей автобустар база үрелир, ылаңгыя кышкы үеде. Ындыг байдалдарда саадаашкыннар тургуспазы-биле «Автоколонна 17» КХН-ниң ажылдакчылары өске транпортту линияже үндүрүптер.
— Маршруттарның расписаниезин дежурный диспетчерлер хайгаарап турар. Ону «Глонасс» капсырылга таварыштыр көөр. Автобустар чогум четчир, ынчалза-даа техника бо-ла үрели бээр, ындыг таварылгаларда бергедээшкиннер тургустуна бээр-дир – деп, кол диспетчер демдеглээн.
«Угаанныг транспорт» деп капсырылганы кижи бүрүзү ажыглап болур. Ооң дузазы-биле автобусту үр манап турбазы-биле, кайда кел чыдарын көрүп алыр аргалыг.
Хоорайның хөй-ниити транспортундан аңгыда, штаттыг режимде хоорай чоогунуң болгаш кожууннар аразының автобустары база ажылдап турар. Найысылалдың автопарыгын чыл санында чаартып турар-даа болза, бир берге айтырыг — кадрлар айтырыы дээрзин «Туваавтотранстың» директору чугаалап турар.
— Хоорай чоогунуң транспорттары ажылдап турар, ол дээрге 105, 104, 106, 107 маршруттар-дыр. Олар чурум езугаар ажылдап турар. 104 дугаар маршрутче немей үш автобусту ажылдадып болур бис, ынчалза-даа чолаачылар чедишпезинден немей автобустар ажылдадыр арга чок болуп турар.
Кожууннар аразынга пассажирлер аргыштырар 4 маршрут бар: Кызыл – Эрзин (неделяда 3 катап чоруп турар), Кызыл – Хандагайты (неделяда 1 катап), Кызыл – Ак-Довурак (неделяда 7 катап) база чоокта чаа ажылдай берген Кызыл – Тээли маршрут (неделяда 3 катап) – деп, директор Айдың Күнзек дыңнаткан.
Чурттакчы чоннуң аргыжылгазын экижидер ажылдар уламчылап турар. Тываның Баштыңы Владислав Ховалыгның чедиишкинниг ажылының ачызында РФ-тиң Транспорт яамызы регионну чыл санында чаа автобустар-биле хандырып турар. Ол ажылды келир чылын база планнап турар.
Хоорайның автопарыгын улгаттырар сорулга-биле найысылалдың мэриязында күрүне лизингизи-биле 20 автобус садып алыр сорулга салдынган. Ол ышкаш хоорайның мэриязы пассажирлер аргыштырар лицензиязы бар хуу сайгарлыкчыларны кады ажылдажылгаже чалап турар.
Алдынай СОЯН белеткээн.
Чурукту интернеттен алган.
“Шын” №91 2023 чылдың ноябрь 29