Бо чылдың июнь 29-та чаӊгысклассчылар шупту өскен-төрээн суурувус Аянгатыныӊ арыг агаарын тынып, аян-шыгынга чыглып, клазывыс башкызынга чедип, солун сактыышкыннарны чугаалажып, дыка-ла эки дыштандывыс.
Бодаарга-ла, 20 чыл эрткен, хөй хуусаа ышкаш. Херек кырында эштеримни көөрүмге, ол-ла школачы чорааны ышкаш, тенек, баштак хевээр болдулар. Дооскан школавысты эргижирээни-биле бузуп каапкан. Амгы үеде школачылар интернат турган оран-савада өөренип турар. Ону барымдаалааш, 2004 чылдыӊ доозукчулары чугаалашкаш, өскен-төрээн суурувуска бир-ле уттундурбас, чараш чүүл арттырып каары-биле, «Мээӊ ынак Аянгатым» деп демирден стелланы кылдырып, тургустувус. Ол төөгүге артар!
Клазывыс башкызы Апрель Бадыевич Шокар. 5-ки класстан 11-ги класска бисти хөй санныг өөреникчилериниң хеймери кылдыр доостурган кижи. Башкывыс школага 50 чыл ажылдаан. Амгы үеде ол хүндүлүг дыштанылгада. «Ажылдап келген чылдарымда черле мындыг тенек класс кажан-даа көрбээн мен. Кыс уругларыныӊ тенээ ат болган, оол уругдан артык болур чүве-дир» – деп бисти кончуур турган. Көк Нива чычаанын мунуп алган, шыкпыыжын тудуп алган бисти сүрүп турганын сактып, буруувусту миннип-даа турдувус. Клазывыс уруглары, оолдары шупту эртем-билиглиг, өглүг-баштыг, ажы-төлдүг эки чурттап чоруурлар.
Бо үеде башкывыс өлчей-чолдуг өгбе назынче кирген-даа бол, адак-бышкаа чиик, малын кадарып маӊнап турары өөрүнчүг болду. Өөреникчилерин көргеш, өөрүп, бистиң чедиишкиннеривис дээш чоргаарланып чоруурун чугаалап, шуптувуска ак орукту, ам-даа шак-ла мынчаар, демниг эдержип чоруурувусту күзеп, өөрүшкүзүн карак чаштары-биле илередип турду. Ам-даа бистиӊ аравыска хөй чылдар иштинде чоруурун башкывыс Апрель Бадыевич Шокарга күзедивис!
Азияна СААЯ.
Чуруктарны авторнуң архивинден алган.
“Шын” №51 2024 чылдың июль 10