Тыва Республиканың Чазаанга регион чазааның даргазының оралакчызы Шолбан Сендаштың даргалаашкыны-биле 2025 чылда республикада муниципалдыг районнар болгаш хоорай округтарының административтиг комиссияларының ажыл-чорудулгазының түңнелдерин чугаалашкан хурал болуп эрткен.
Чыл дургузунда комиссиялар 2153 административтиг херекти сайгарып, ниитизи-биле 3 сая рубль хире түңнүг торгаалды онаар дугайында 1744 доктаалды үндүрген. Ол түңүнден 1,8 сая ажыг рубльди эки туразы-биле база суд пристав албаны чыгган. 2024 чылга деңнээрге, торгаалдар онааган административтиг херектерниң саны ийи катап көвүдээн. Оон ыңай корум-чурум үрээн 199 херекке сагындырыгны үндүрген, а 210 херекти соксаткан.
Хурал үезинде Тываның Чазааның Даргазының оралакчызы административтиг материалдарның эң хөйүн, азы 809 херекти сайгарган Кызыл хоорайның административтиг комиссиязы шалыпкын болгаш демниг ажылдаанын онзалап айыткан. Тес-Хем (166), Таңды (154), Кызыл (136), Улуг-Хем (129), Сүт-Хөл (121) кожуун комиссияларының ажылын база демдеглээн. Ол ышкаш Тыва Республиканың Юстиция яамызының дыңнатканы-биле алырга, комиссияларже чоруткан административтиг протоколдарның көвей кезии күрүне эрге-чагыргазының федералдыг органнарындан келген.
Тус чер бот-башкарылга органнарының административтиг комиссиялары Тыва Республиканың административтиг чурум үрээшкиннериниң дугайында хоойлунуң 35 чүүлүнде көрдүнген чурум үрээшкиннерин сайгарып турарын демдеглээр апаар. 2025 чылда эң нептереңгей чурум үүлгедиишкиннери – шимээн-дааш үндүрүп, хамаатыларның амыр-дыжын үрээни, ол ышкаш мал-маган болгаш азырал дириг амытаннар тударының дүрүмнерин хажытканы болган. Оларның аразында малды кадат чок үндүрген, ооң хайы-биле орук озал-ондаа болгаш мал оорлаар чорук болган, ол ышкаш ыттарны баглавайн турар таварылгалар бар.
2025 чылда муниципалитеттерниң административтиг комиссияларының бүрүн эргезинче бажыңга шош-содаа үндүргени дээш, харыысалганы онаарын көрген чүүлдү 2025 чылдың июньда Тыва Республиканың Административтиг чурум үрээшкиннериниң дугайында хоойлуже Тыва Республиканың Хоойлузу-биле киирген. Бо чүүлге даянып, эрткен чылын 193 хамаатыга онааштыр протоколдарны долдурган.
«Өг-бүлезиниң иштинде шош-содаа үндүрер чорук бо-ла болгулаар болгаш, амгы ниитилелдиң чидиг айтырыгларының бирээзи апарган. Ол оон-даа аар кем-херек үүлгедиишкиннеринге чедирип болур айыылы улуг» - деп, республиканың Юстиция яамызы Россияның ИХЯ-зының албан езузунуң медээлеринге даянып демдеглээн.
Оон аңгыда 2025 чылда аът чарыжының маргылдааларын эрттирер дүрүмнерни сагып турарын контрольдаар бүрүн эргени муниципалитеттерниң административтиг комиссияларынче дамчыткан. Ооң мурнунда ындыг чурум үрээшкиннерин Тываның Спорт яамызы демдеглеп турган.
ТР-ниң Чазааның парлалга албаны.