2026 чылда «Узун болгаш идепкейлиг амыдырал» деп национал төлевилел ёзугаар баштайгы кадык камгалалының чаартылгалыг программазы-биле Таңды кожууннуң Кызыл-Арыг суурда фельдшер-акушер пунктузун тудары планнаттынган. Модульдуг объект чурттакчыларга баштайгы дузаны болгаш амгы үениң стандарттарынга дүгжүп турар ачы-дузазын алыр арганы бээр. Республиканың беш кожууннарында эмнелге албан черлери база чаарттынып эгелээр.
Тываның Кадык камгалал яамызы беш эмнелге албан черлеринге улуг чаартылгаларны кылырын тодаргайлаан:
- Ак-Довурак хоорайның дүн-хүн чокка ажылдаар стационар халдавырлыг аарыглар салбырынга;
- Самагалдай суурда поликлиникага;
- Шагонар хоорайның поликлиникага;
- Бай-Хаак суурда стационар салбырга (планнаттынган үш чаданың бир дугаары);
- Хову-Аксы суурда стационар эмнелгезинге.
Оон аңгыда бо чылын регионда он беш кадык камгалал албан черлеринге амгы үениң 57 эмчи дериг-херекселдерин, ооң иштинде диагностикага болгаш дүрген дуза чедиреринге чугула херек бедик технологиялыг херекселдерни садып алыр. Садып алган дериг-херекселдерниң аразында өкпениң, наркоз болгаш тыныш системаларының аппараттары, реанимация столунче шилчидер функциялыг база үзүктел чок электри хандырылгалыг чаа төрүттүнген чаштарга инкубаторлар, чүрек мониторлары, кольпоскоптар, риноларингофиберскоптар болгаш эндоскоп системалары бар.
Ниитизи-биле Тывада баштайгы эмчи дузазын чаартыр программаны боттандырып турда, 34 эмчи дузазы чедирер пунктуну база 12 амбулаторияны ажыглалче киирген, 21 объектиге улуг чаартылгаларны кылган. Эмчи организациялары 179 дериг-херексел-биле, 48 автотранспорт-биле, ооң иштинде көжүп чоруур флюорография болгаш маммография системалары-биле хандыртынган.
Бистиң корр.
Чурукту ТР-ниң Чазааның парлалга албанындан алган.