Андрей Первозванный фондузу М.В. Ломоносов аттыг Москваның күрүне университединиң журналистика факультединиң болгаш «Истоки» тускай капитал фондузунуң деткимчези-биле өг-бүле темаларынга материалдар болгаш социал төлевилелдерни чырыдып чоруур авторларны бүгү-российжи мөөрейге киржиринче чалап турар.
Мөөрей сес аңгы номинацияга эртер: «Парлалга МИЧ», «Радио», «Телевидение», «Интернет-СМИ», «МИЧ-терниң социал төлевилелдери», «Аныяк коррларга редакция төлевилелдери», «Аныяк журналист» (18-тен 25 харлыг авторларга), «Социал журналистика башкызы».
Федералдыг, регионалдыг, муниципалдыг болгаш өске-даа МИЧ-тер журналистериниң, дээди өөредилге черлериниң башкыларының ажылдарын 2026 чылдың июль 25-ке чедир хүлээп алыр.
Мөөрейге киржирде, Яндекс.Формы деп сайтыда бо шөлүгге: forms.yandex.ru/u/69972f1e... чагыг анкетаны долдурары албан.
«Парлалга МИЧ», «Радио», «Телевидение» база «Интернет-МИЧ» деп номинацияларже 2025 чылдың июнь 15-тен 2026 чылдың июль 15-ке чедир өг-бүле темазынга парлаттынган 3 материалды киирер.
«Аныяк журналист» деп номинацияга 2025 чылдың июнь 15-тен 2026 чылдың июль 15-ке чедир социал теманы чырыткан автор чаңгыс материалды-даа киирип болур. Массалыг информация чепсектериниң 18-тен 25 харга чедир назылыг авторлары номинацияга киржип болур.
«МИЧ-терниң социал төлевилелдери» биле «Аныяк коррларга редакция төлевилелдери» номинацияларга 2024 чылдың январь 1-ден 2026 чылдың июль 15-ке чедир тургускан төлевилелдерни киирер.
«Социал журналистика башкызы» номинацияга киржирде, ажылдап турар черин, арга-дуржулгазын, социал журналистиканы башкылаан чылдагааннарын, 2024 чылдан январь 1-ден эгелеп 2026 чылдың июль 15-ке чедир боттандырган өөредилге практикаларын (тускай семинарлар болгаш курстар, мастерскаялар, факультативтер болгаш өске-даа практикаларны), студентилер-биле төлевилелдерин (социал темаларга материалдар белеткээри, редакция болгаш медиа-төлевилелди тургузары, экспедицияларны организастаары) болгаш өске-даа төлевилелдер дугайында кыска медээлерни бээр ужурлуг.
Чагыгны чүгле чаңгыс автор киирер (коллективтиг чагыгларны хүлээвес). Массалыг информация чепсектериниң санынга кызыгаарлаашкын чок, автор кижи элээн каш номинацияларга киржип болур. Чаңгыс ажылды аңгы-аңгы номинацияларга киириштирери хоруглуг.
Файлдар үлежир сервисче кирген мөөрей материалдарының шөлүглери 2026 чылдың декабрь 1-ге чедир турар.
Мөөрейже чагыг киирериниң дүрүмнерин база ону эрттирериниң дугайында бо Дүрүмде тодаргай бижээн: disk.yandex.ru/i/ufXR4NTe...
Мөөрейниң 150 ажыг киржикчилери финалче эртип, үш хүннүг конференцияга киржир кылдыр Москваже чалаттырар (киржикчилер орук өртээн болгаш чемненир өртээн боттары төлээр болза, чурттаар черни организакчылар харыылаар).
Түңнел кезээнче кирген 50 ажыг авторлар кол болгаш тускай шаңналдарны алыр. Номинация бүрүзүнге 1-ги, 2-ги, 3-кү черлер алган улуска акша шаңналдарын тыпсыр. Мөөрейниң Эксперт чөвүлелиниң даргазының тускай шаңналдарынга төлептиг болган киржикчилер база акша шаңналын алыр.
«Өг-бүле болгаш Россияның келир үези» бүгү-российжи мөөрейниң координатору: Дарья Вржесинская. Электроннуг почтазы: konkursfap_2026@mail.ru
«Өг-бүле болгаш Россияның келир үези» деп мөөрей 2014 чылдан бээр чылдың-на эртип турар болгаш өг-бүле айтырыгларынче массалыг информация чепсектериниң кичээнгейин хаара тударынга, журналисчи материалдарның шынарын бедидеринге улуг ужур-дузалыг апарган. 2025 чылда мөөрейниң организастыг комитединче 2025 чылда Россия Федерациязының 69 регионундан журналистер 548 чагыгны киирген.