Амгы үениң аныяктары чурагайлыг технологияларның болгаш чаартылгаларның салдарындан кандыг апарганын сонуургап көөр болза, мындыг. Ол колдуунда 1990 чылдарның ортаа үезинден 2010 чылдарның эгезинге чедир төрүттүнген "зумерлер" болгаш 2010 чылдан 2024 чылга чедир төрүттүнген "альфалар" деп салгалдарның дугайында чугаа чоруп турар.
“Салаазында кнопкалыг төрүттүнүп келген”. Оларның хөй кезиинге интернет четкизи кончуг чугула. Оларга интернеттен медээлер тывары, аңаа найыралдажыры, онлайн садыглардан садыглажыры, чаа-чаа чүүлдерни чогаадып тургузары белен.
Кичээнгейи кыска.Чаңгыс чүүлче чүгле 8 секунда дургузунда кичээнгейин углаар. Ындыг болганындан чагаа бижиирде, сөзүглел орнунга, колдуунда смайликтер, чуруктар ажыглаарлар.
Үр үениң трендилери оларга турбас. Социал четкилер үргүлчү-ле чаарттынып турар. Модада идик-хеп, херекселдер чүгле бөгүн турар, эртенинде олар солчуп каар. Ынчангаш оларның сонуургалдары чаңгыс черге турбас.
Улуг улусту кол кылдыр көрбес. Аныяктар улуг улусту авторитет кылдыр көрбес, боттары-биле дең кижилер дег чугаалажыр. Ынчангаш олар бичии уруглар чурагайлыг технологияларны олардан артык билир деп санаарлар.
Хөлүн эрттир өпейледип каапканы болгаш ооң түңнели. Ада-иелер колдуунда амыдыралчы хүлээлгелерни боттарынга хүлээнип алырлар. Ынчангаш амыдыралда берге айтырыгларны шиитпирлээринге олар чаңчыкпаан ужуру ол.
Бодун өскелерден ылгалдыг, тускай мен деп санаар. Бичиизинден тура уруг бүрүзү бодунуу-биле онзагай деп бодалды сиңниктирип каан болур. Түңнелинде уруг өскелерге көңгүс дөмейлешпес мен дээрзинге кончуг бүзүрелдиг.
«Мейнстрим салгалы». Боттарын чеже-даа өскелерден ылгалдыг бис деп бодап чорза, аныяктар бот-боттарынга дөмей чүүлдери база бар. Олар массалыг информация чепсектеринден болгаш билдингир блогерлерниң көргүзүп турар сүмелерин дендии эдерерлер. Ынчалза-даа олар боттарын чаңгыс салгал бис деп көрбейн турар. Ол чүүл аныяктарны каттыштырып турар.
Шимээн үндүрбейн, оожум удурланыр. Олар дүрүмнерге кончуг чагыртыр. Канчаар шын кылыр, ол дээш турарлар. Ынчалза-даа олар ада-иезинге билдиртпезин кызарлар.
Бодун миннири болгаш турум байдал. Аныяктар ажылын, хууда чуртталгазын, сагыш сеткилиниң кадыкшылын деңге тударын кызыдарлар. Ынчангаш олар өг-бүле тудуп, ажы-төлдүг болурунче далашпас. Оларныы-биле баштай акша-хөреңги болгаш социал тала-биле турум байдалды чедип алыры.
Ажылынга үнелиг болуру. Бир эвес кандыг бир ажылчын олуттуң азы төлевилелдиң бир-ле чүүлдери аныяктарга таарышпас болза, олар ойталаарынга белен. Хөй-ле аныяктарга ажыл боттарынга таарымчалыг байдалды тургузуп турары чугула.
Чурукту ГигаЧатка чуруткан.
“Шын” №25 2026 чылдың июль 2
"Шын" солуннуң МАХ-каналынга каттыжыңар: max.ru/join/egenQ...