Тожу кожууннуң Өг-бүлеге болгаш уругларга социал деткимче көргүзер төвүнүң директору Аяна Анандыевна Монгуш кожуунда социал байдалы берге өг-бүлелер дугайында таныштырган:
– Бо хүнде Тожу кожуунда (май 31-ниң көргүзүү-биле) социал байдалы берге 27 өг-бүле бар. Бо өг-бүлелерни социал адырның ажылдакчылары хайгааралда алган. Оларның 18-зи ажы-төлүнге социал төлевирлерни ап турар. Ай санында уруглар пособиелери үнүп эгелээрге-ле, сумулар аайы-биле социал ажылдакчылар ол өг-бүлелерге хайгааралды күштелдирер. Ол дээрге-ле Доора-Хем, Ий, Адыр-Кежиг суурлар-дыр.
Штатта 5 социал ажылдакчы бар, олар бо өг-бүлелерни хайгаарап турар. Социал төлевирлер ап турар өг-бүлелерде чогум улуг корум-чурум үрээшкиннери чок. Олар уругларының пособие акшазын алгаш-ла, амыдыралынга бо хүнде эң-не херек, чедишпейн турар чүүлдерин садып ап турарлар. Чамдык өг-бүлелерни социал ажылдакчы акшазын шын чарып билиринге өөредип турар, чижээлээрге, одаар ыяш-дажын, херек эт-сеп, идик-хепти азы аъш-чемни арбыдадыр садып алырын сүмелээр. Ийи-чаңгыс чурум үрептер, арага-дары ижиптер таварылгалар тургулаар. Олар-биле улаштыр полиция ажылдакчылары ажылды чорудар.
Ажы-төлүн хавырткан социал өг-бүлелер база бар. Олар-биле тускай социал үделгелиг программа ёзугаар ажылдап турар бис. Ол өг-бүлелер эттинип, ажы-төлүн дедир эгидип алырынга чедир 6 ай азы 1 чыл дургузунда ажылды чорудар. Ындыг өг-бүлелерниң санын эвээжедир дээш ажылдап турар бис. Алкоголизмден уштунуп шыдавайн чоруур аарыг улусту нарколог эмчилер эмнеп турар, байдал оон берге апарза, Республиканың наркология диспансеринге чыда эмнедир. Оон сегереп, эттингеш, ажы-төлүн өг-бүлезинче дедир эгиткеш, эки чурттап чоруй баарлар. Чамдык таварылгаларда катап база арага ижип алыр ада-иелер бары хомуданчыг.
/ Бистиң корр.