2022 чылда республикага кудумчу-орук четкизиниң участоктарын сегидер дээш, улуг хемчээлдиг ажылдар кылып чоруттунган. Ол бүгү ажылдарның түңнелинде чолаачыларның болгаш чадаг кижилерниң чорууру таарымчалыг болгаш айыыл чок болган, а эң-не кол чүүл – социал ужур-дузалыг албан черлеринче чедери дүрген болгаш эптиг апарган.
«Айыыл чок болгаш шынарлыг оруктар» национал төлевилел езугаар 30,296 км оруктарны септээн. Чижээлээрге, Кызыл хоорайның Пушкин, Университетская, Буренская, Ооржак Лопсанчап, Звездная, ТАР-ның 90 чылы, Степан Сарыг-оол, Оюн Күрседи кудумчуларында болгаш Кызыл–Вавилин ээтпээ автобус шугумунда оруктарны асфальтылаан, Кызыл – Сарыг-Сеп, «Бай-Хаак суурже кирер чер», «Хову-Аксы суурже кирер чер», «Кара-Хаак суурже кирер чер» деп тус черниң оруктарында орук чадыын солаан. Бо хүннерде Тываның девискээринде 2022 чылдың планы мурнаашкынныг күүсеттинген. Планда көрдүнгени езугаар Кызыл хоорайның чоок-кавызында оруктарның 68,29 хуузун септээр тургаш, ону 69,52 хуу боттандырган. Оруктар септелгезинге көрдүнген акшаландырыышкынны өй-шаанда шиңгээдип алган. Норма-чижектер негелделеринге дүүштүр планнаттынган шупту объектилерни болур-чогуур хуусаазында дужааган.
2022 чылда «Айыыл чок болгаш шынарлыг оруктар» национал төлевилелдиң акша-хөреңгизи-биле айыылдыг участоктарга орук шимчээшкининиң дүрүмнериниң хажыдыышкыннарын фото, видеога бижидип бүрүткээр 23 дериг-херекселди садып алган. Амгы үеде республикада фото, видео бүрүткелдиң 64 дериг-херексели ажылдап турар.
Оларның ачызында бо чылдың 10 айының дургузунда административтиг корум-чурум үрээшкиннериниң дугайында 97801 доктаалды үндүрген.
Бо чылын орук шимчээшкинин айыыл чок болдурар дээш база кудумчу-орук четкизин септеп-секпередир дээш, 112 орук демдээн, «Уруглар» деп бижиктиг 8 пиктограмманы, 1544 дөрбелчин метр орук шыйыын, айыылдыг участоктарга орук шимчээшкининиң дүрүмнериниң хажыдыышкыннарын фото, видеога бижидип бүрүткээр 23 дериг-херекселди тургускан.
2023 чылда база улуг хемчээлдиг ажылдарны чорудары көрдүнүп турар. «Айыыл чок болгаш шынарлыг оруктар» национал төлевилел езугаар кудумчу-орук четкизиниң 15 километр участогун септээр. Септелге ажылдарын 2023 чылдың апрель 1-ден эгелээш, октябрь 31-ге чедир үе дургузунда чорудар. Ол ышкаш 2023 чылда Хавырга дааның эдээнде Будда бурганның тураскаалынга чедир канат оруктуң тудуу эгелээр.