Эрткен неделяда найысылалда Аныяктар өргээзинге ТР-ниң Арбитражтыг шүүгү чери тургустунгандан бээр 35 чыл болган оюн демдеглеп эрттирген. ТР-ниң Баштыңы Владислав Ховалыг болгаш ук адырның хоочуннары дээш чалаткан аалчылар көрүкчүлер залын дола берген.
Байырлыг хуралды РФ-тиң болгаш ТР-ниң ыдык ырылары-биле ажыткан соонда, ТР-ниң Арбитражтыг шүүгү чериниң даргазы Аяс Таргын сөс алгаш, коллегаларынга байыр чедиргеш, хүндүлүг аалчыларга байырлалга келгени дээш өөрүп четтиргенин илереткен.
«Кандыг-даа херектиң артында кижилерниң салым-чолу, бизнес болгаш бүдүн бүдүрүлге черлериниң келир үези турар. Харыысалга улуг. Харыысалга дээрге-ле силерге бүзүрелди хүн бүрүде ажыл-херектер-биле бадыткаарыңар-дыр» – деп, ол чугаалаан.
Ооң соонда ТР-ниң Баштыңы Владислав Ховалыг Арбитражтыг шүүгү чериниң ажылдакчыларынга, хоочуннарынга байыр чедирген. Республикада экономиктиг чөптүг чоруктуң төөгүзү шагда-ла, 80 чыл бурунгаар-ла, эгелээн дээрзин ол демдеглээн.
Ооң чугаалааны-биле алырга, Арбитраж судунуң турум болгаш бот-тускайлаң ажылдаары Тываның Чазаанга стратегтиг ужур-дузалыг. Бизнестиң бүзүрели, инвестиция байдалы болгаш регионнуң чаагай чоруу суд шиитпирлериниң ажык-чарлыг, шынарлыг болгаш дүрген болурундан хамааржыр.
Экономиктиг чөптүг чорук дээрге чүгле өре, банкротство азы өнчү эргелериниң дугайында маргылдааны шиитпирлээри эвес-тир. Регионнуң экономика талазы-биле чаагай чоруу суд шиитпирлериниң ажык-чарлыг, шынарлыг болгаш дүргенинден хамааржыр дээрзин ол демдеглээн.
«Кылып чоруур ажылыңар дээш, мергежилиңерге бердинген чорууңар дээш өөрүп четтирдим. Чаа-чаа чедиишкиннерни, кызыгаар чок күш-шыдалды, быжыг кадыкшылды күзедим» – деп, ТР-ниң Баштыңы Владислав Ховалыг чугаалаан.
Ооң соонда шүүгү системазының хөгжүлдезинге киирген үлүг-хуузу база хөй чылдарда ак сеткилдиг ажылы дээш Тываның Баштыңының өөрүп четтириишкин бижиктерин болгаш Тыва Республиканың хүндүлел бижиктерин Владислав Ховалыг шылгараңгай ажылдакчыларга тывыскан.
Шүүгү чериниң даргазының оралакчызы Наталья Хайдып албан чериниң ажылының көвүдеп турарының дугайында чугаалаан. Ол дээрге чоннуң бүзүрелиниң бадыткалы дээрзин ол демдеглээн. Оон бадыткалы болза баштайгы чылдарда 100 хире херектерни көрүп турган болза, а амгы үеде 7-8 муң херектерни чыл дургузунда Арбитражтыг шүүгү чери өөренип көрүп, чөптүг шиитпирлерни үндүрүп турары-дыр.
/ Айдың ОНДАР.
Буян ООРЖАКТЫҢ тырттырган чуруу.
“Шын” № 39 2026 чылдың октябрь 8
"Шын" солуннуң МАХ-каналынга каттыжыңар: max.ru/channel_shyn