Тывада «Элээр суур» деп республика мөөрейинге киржир 40 суурну шилээн. Көдээ черниң чурттакчы чонунуң аразынга алкоголь болгаш наркотикке удур демиселди чорудар, кадык амыдыралды сайзырадыр сорулга-биле ук мөөрейни эрттирип турар.
Шилиттинген суурлар кадык амыдыралды суртаалдаар талазы-биле хемчеглерге идепкейлиг киржир, чурттакчы чон аразынга профилактиктиг ажылдар чорудар база арага болгаш наркотикке удур бот-идепкейлиг болур.
«Элээр суур» деп мөөрейге киржилге шилиттинген суурларга чүгле ол берге айтырыглар-биле ажылдаар эвес, тус черниң чурттакчыларының кадык болгаш аас-кежиктиг чуртталгазы дээш таарымчалыг байдалды тургузар.
Ук мөөрейни Тываның Баштыңы Владислав Ховалыгның бот-идепкейи-биле тургускан. Шаңналдыг черлер алган суурлар бир дугаар чер дээш 1 сая рубль, ийи болгаш үш дугаар чер алганнарга 400 биле 200 муң рубль акша шаңналдарын алыр.
Акша шаңналын тиилекчи муниципалитеттерниң бюджединче бюджеттер аразының трансферттери хевирлиг кылдыр шилчидер — чылда көрдүнген чарыгдалының кырынче бонус ышкаш. Мөөрейниң негелделери-биле шаңнал акшазын тус черниң эрге-чагыргазы хөй-ниити девискээрлериниң чаагайжыдылгазынче ажыглап болур.
Бистиң корр.
«Шын» №36 2024 чылдың май 18