Чыл эгезинден тура Тывадан 409 өг-бүле Россияның социал фондузундан ие капиталында 10 муң рубльдан эвээш арткан кезиин алган.
2025 чылдың эгезинден тура Тыва Республиканың 400 ажыг өг-бүлези Россияның социал фондузунуң регионалдыг салбырындан ие капиталы дээш алыр акшаларының арткан кезиин чаңгыс удааның төлевири кылдыр алыр аргалыг болган. Шак ындыг деткимчени ие капиталы дээш алган сертификадында акша түңү 10 муң рубльдан эвээш өг-бүлелерге тускайлаан.
Төлевирлерни өг-бүледе уруг-дарыгның назы-харын болгаш ада-иезиниң саң-хөө байдалын барымдаалавайн берип турар. Шак ындыг деткимче 2024 чылдың сентябрьда сертификат алыкчыларынга бир дугаар таваржып турар. Кол негелдези — ие капиталының сертификадында 10 муң рубль четпейн турарын айытканын көргүзер.
Шак ындыг ие капиталы дээш алыр акшаның арткан кезиин алырда, билдириишкин бижиир. Ону Социал фондунуң болгаш Хөй хүлээлгелиг төптүң (МФЦ) клиентилер хүлээр регионалдыг албанынга Күрүне ачы-дуза порталынга интернет таварыштыр киирип болур.
Билдириишкиннерни беш ажыл хүнүнде көөр, ооң соонда беш хонук дургузунда билдириишкин киирген кижиниң банкыда агар санынче акшаны шилчидер.
Сертификадында алыр акшазының арткан түңүнүң дугайында ушта бижидилгени Күрүне ачы-дуза порталындан интернет таварыштыр чагыдып ап болур. Харыызы хамаатының хууда кабинединге чаңгыс хонук дургузунда кирип кээр.
Хамаатыларның кичээнгейинге! Бо ие капиталынга көрдүнген акшадан чаңгыс удаа алыр арга болуп турар. Сертификатта акшаны уштур схемалар ажыглаары хоойлуга дүүшпес болгаш хоойлу ёзугаар харыысалгага онаады берип болур.
Сагындырып каар чүүл – ие капиталынга көрдүнген акшаны аңгы-аңгы угланыышкыннарга ажыглап болур: чурттаар оран-сава байдалын экижидип алыры, өөредилге өртээн төлээри (ооң иштинде бөлгүмнер болгаш секциялар дээш), эвээш орулгалыг өг-бүлелерге ай санында төлевир кылдыр бээри. Ол ышкаш ие капиталының акшазын аваның азы ачаның пенсиязынче мөөңнээн акшаже шилчидип болур, инвалид ажы-төлдү социал байдалга чаңчыктырар болгаш интеграция ниитилелдеринче база оон ап турар ачы-дуза, хереглел барааннарының төлевиринче шилчидерин чөпшээреп турар.
Немелде медээни РСФ-тиң Чаңгыс аай медээ төвүнүң дараазында телефонунче долгааш, билип ап болур: 8-800-100-00-01 (долгаары халас). Оон аңгыда консультацияны РСФ-тиң Тывада салбырының клиент салбырында чорудуп турар.
Бистиң корр.
Чурукту “Шедеврумдан” алган.
“Шын” №44 2025 чылдың ноябрь 13