2026 чылда Тываның 1800 чурттакчызы пенсияже үнген. Оларның 90 ажыг хуузу пенсияже үнериниң назы-хары чедериниң ырак мурнунда, 5 чыл бурунгаар, документилерин белеткеп эгелээннер.
Россияның Социал фондузунуң Тывада салбырының клиентилер албанының килдизинге боттары баргаш, пенсияже үнериниң документилерин белеткеп эгелээриниң дугайында билдириишкинни олар кииргеннер, азы ажыл берикчизи дамчыштыр документилерни белеткеп эгелээннер.
Пенсияже үнериниң документилерин баш бурунгаар белеткээриниң кол сорулгазы – ажыл стажы, ажыл төлевири, санап каан болгаш төлеп каан камгаладылга дадывырларының хемчээли, пенсия коэффициентилери дээш пенсияже үнерин, алыр пенсия акшазының хемчээлин бадыткаар документилерниң шуптузунуң долу учёдун тургузары. Мындыг баш бурунгаар ажылдың түңнелинде назылап кырааны дээш камгаладылга пенсиязын өй-шаанда болгаш долузу-биле ап болур байдал тургустунар.
“Тываның чурттакчыларынга пенсияже үнери белен болгаш кандыг-даа шүүдел чок болзун дээш, ажылдап турар бис. Пенсияже үнериниң документилерин баш бурунгаар белеткээри хамаатының күш-ажылының дугайында документилеринде будулгаазынныг чүүлдерни баш бурунгаар тодарадырынга дузалыг” деп Россияның Социал фондузунуң Тыва Республика талазы-биле салбырының эргелекчизи Лилия Күжүгет чугаалаан.
Херээжен кижи (45–50 хар), эр кижи (50–55 хар) пенсия үнериниң хуусаазы чоокшулаарга, ооң бодунуң хууда агар санында байдал дугайында дыңнадыгны “Күрүне ачы-дузазы” чаңгыс аай портал дамчыштыр алыр. Бир эвес ол кижи бодунуң күш-ажыл төөгүзүнде кандыг-бир демдеглелдер чок азы четче эвес болза, оларны бадыткаар ужурлуг документилерни чогуур черлерден тывар, Россияның Социал фондузунуң Тыва Республика талазы-биле салбырынга киирер аргалыг боор.
Пенсияже үнеринге, төлептиг пенсия акшазын алырынга хамаатыларны баш бурунгаар белеткээр талазы-биле тайылбыр болгаш практиктиг ажылдарны Россияның Социал фондузунуң Тыва Республика талазы-биле салбыры чорудуп турар.
РФ-тиң Тыва Республика талазы-биле СФ-тиң салбыры.
“Шын” №44 2026 чылдың ноябрь 12
"Шын" солуннуң МАХ-каналынга каттыжыңар: max.ru/channel_shyn