Аяс Лопсан боду амгы үеде тускай шериг операциязында киржип турар. Ол үш ажы-төлдүң адазы. Өөнүң ишти-биле сүмелешкеш, 17 дугаар школаның хөй ажы-төлдүг өг-бүлелериниң уругларынга 50 белекти өг-бүлезиниң өмүнээзинден сөңнээр деп шиитпирлээннер. Белектер чигирзиг аъш-чем болгаш чүзүн-баазын ойнаарактардан тургустунган.
ТР-ниң «Буянныг чүректиглер» аныяктар шимчээшкининиң кежигүннери Аяс Лопсанның өөнүң иштиниң дилээ-биле белектерни 17 дугаар школага чедиришкен. Ук школаның башкылары Аяс Лопсанга болгаш белектерни эккеп берген волонтёрларга өөрүп четтиргенин илереткен.
«Буянныг чүректиглер» аныяктар шимчээшкини 2014 чылдан тура ажылын эгелээн. Ол үениң дургузунда волонтёржу аныяктар санап-түңнеп четпес акцияларны, хемчеглерни эрттирген. Олар өскүстерге, кадыының байдалы-биле кызыгаарлыгларга, хоочуннарга, хөй ажы-төлдүг өг-бүлелерге дээш оон-даа өске дуза хереглээн хамаатыларга дузазын кадып чоруур дээрзин сагындыраал.
А. ОНДАР.
Чуруктарны интернеттен алган.
“Шын” №98 2023 чылдың декабрь 23