Эрткен дыштаныр хүннерде ОШАЧКИ ажылдакчылары биле Федералдыг суд приставтарының Тывада эргелелиниң ажылдакчылары республика чергелиг “Өрелиг” рейдини чоруткан.
Кызыл хоорайның кудумчуларынче суд приставтары, күрүнениң автоинспекциязының ажылдакчылары — барык 50 кижи рейдиже үнген. Олар орук шимчээшкинин хажытканы дээш торгаалдарын төлевейн турар база өске-даа өрелиг улусту илередири-биле, 160 автомашинаны дозуп, чолаачылар-биле профилактика ажылын чорудуп, «Банк данных исполнительных производств» ФСП-ниң электроннуг сервизинче киргеш, өре бар бе дээрзин хынап алырын сүмелеп турган.
Шынап-ла, өрелиг чолаачыларга суд приставтарының хүлээп алыышкынынга албан кээр негелде саазыннарны тыпсып, өскелеринге РФ-тиң Административтиг чурум үрээшкининиң дугайында хоойлузунуң 20.25 чүүлү-биле административтиг протоколдарны тургускан.
“Хыналда үезинде чамдык чолаачылар шалыңы кызырылганындан өрезин дуглап шыдавайн турарын, өскелери өрелиг деп безин билбээнин тайылбырлап турдулар” – деп, Кызыл хоорай болгаш Кызыл кожууннуң суд приставы Айкиз Доспан чугаалаан.
Ниитизи-биле республика девискээринге чоруткан рейдиниң түңнелинде 500 чолаачыны хынаан.
Бистиң корр.
Чурукту Федералдыг суд приставтарының Тывада эргелелиниң парлалга албанындан алган.
“Шын” №91 2024 чылдың ноябрь 27