Национал төлевилелдерни боттандырып турарын июнь 26-да республиканыӊ Чазак бажыӊынга сайгарып чугаалашкан. Ведомстволар аразында штаб хуралын видеоконференция харылзаа чуруму-биле Тыва Республиканыӊ Чазааныӊ Даргазыныӊ бирги оралакчызы Владимир Донскихтиӊ удуртуп эрттирген.
Национал төлевилелдиӊ хөреӊгизи-биле үндезин септелге кылып турар объектилер — республиканыӊ эрге-чагыргазыныӊ онза хыналдазында.
Бо чылдыӊ беш ай дургузунда республикада херек кырында боттандырган национал төлевилелдерниӊ түӊнелдерин Тываныӊ Чазааныӊ төлевилелдер ажыл-чорудулгазыныӊ эргелелиниӊ, культура, орук-транспорт комплекизиниӊ, өөредилге, экономиктиг хөгжүлде болгаш үлетпүр яамыларыныӊ, ол ышкаш Аныяктар херектериниӊ талазы-биле агентилелдиӊ ажылдакчылары тус тузунда илеткээн.
Тывага 2023 чылда 12 национал төлевилелди боттандырарынга 12,8 млрд рубль көрдүнген, ооӊ иштинде федералдыг бюджеттен – 12,5 млрд рубль, а регионалдыг бюджеттен – 0,3 млрд рубль.
2023 чылдыӊ июнь 21-де төлевилелдерни боттандырарынга 4,7 млрд рубльди үндүрген. Акша-хөреӊги хөй нуруузунда ажылды хүлээнип алгаш, күүседип турар черлерге аванс төлевири кылдыр берген.
«Кадык камгалалы», «Демография», «Өөредилге», «Культура», «Айыыл чок шынарлыг оруктар», «Чурттаар оран-сава болгаш хоорай хүрээлеӊи» деп национал төлевилелдерниӊ шугуму-биле 66 объектини септеп, эде чаартып, тудуп кылып турар. Оларныӊ аразындан 14 объектиде үндезин септелге кылып турар, а 52 объект дээрге чаа тудуглар болур. 49 объектини тудуп эгелээринге белеткеп, а 10 объектиниӊ төлевилелдерин ажылдап кылып турар.
«Чурттаар оран-сава болгаш хоорай хүрээлеӊи» деп национал төлевилелдиӊ дараазында үш объектизин кылып дооскаш, ажыглалга киирген:
- Туран хоорайда Тывага келген баштайгы орус чурттакчыларныӊ парыгы;
- Тес-Хем кожууннуӊ Берт-Даг суурунуӊ Ленин кудумчузунда хөй-ниити чериниӊ девискээрин чагаайжыткан;
- Өвүр кожууннуӊ Хандагайты суурунда хоккей ойнаар шөлүн аӊгы-аӊгы чүүлдерге ажыглаар кылдыр кылган.
«Культура», «Кадык камгалалы», «Өөредилге», «Демография» национал төлевилелдер-биле кылыр объектилерниӊ дериг-херекселин, техникаларын садып ап турар, хандырылгалар кылыр чагыглар киирерин болгаш өске-даа ажылдарны улаштыр кылып турар.
Чазак Даргазыныӊ бирги оралакчызы Владимир Донских штаб хуралын түӊнеп тура, национал төлевилелдер-биле боттандырып турар объектилерге ажылдар чоруп турда, регионалдыг яамылар кандыг-бир айыылдыг чүүлдер тургустунуп келирин үезинде эскерип, ындыг байдалдарны чайладыр хемчег алыры чугула дээрзин демдеглээн.
Тыва Республиканыӊ Чазааныӊ медээзи-биле Р. Демчик белеткээн.