Электроннуг күш-ажылчы дептери дээрге чурагайжыткан документ болур. Ону ажылчынга болгаш ажыл берикчизинге эптиг болзун дээш кылган. Саазын дептер элеп эргижиреп, ооӊ бижии балалы бээрге, ону солудуп, аай-дедир албан черлери барып, катап бижидери база шүүттүг.
Күш-ажылчы дептерниӊ электроннуг хевирин 2020 чылдан тура ажыглап турар. Оон бээр 50 муӊ ажыг кижи билдириишкин бижээш, боттарыныӊ саазын күш-ажылчы дептерин электроннуг хевирже шилчидип алган. Бир дугаар ажылдап кирген 5538 муӊ кижиге база электроннуг күш-ажылчы дептерин ажыткан. Ынчангаш Тывада 55,7 муӊ ажыг кижи электроннуг күш-ажылчы дептеринче шилчээн.
Кайы-даа үеде хереглээн медээни дораан билип ап болуру электроннуг күш-ажыл дептериниӊ эӊ-не эптиг талазы дээрзин улус чугаалап турар. «Госуслугада» бодунуӊ хуу кабинедин таварыштыр ону каш минута иштинде билип ап болур. Бо чылдыӊ ноябрь айга чедир барык 15 млн ажыг чагыг кирген.
– Өске черге ажылдаар дээн кижи бодунуӊ электроннуг күш-ажыл дептеринден ушта бижилгени чорудуп болур. Ону чурагайлыг хол үжүү-биле бадыткап каан болганда, ол саазын дептер-биле дөмей. Ынчангаш документини эптии-биле ажыл берикчизинче электроннуг почта-даа таварыштыр чорудуп болур – деп, Тыва Республикада Россияныӊ Социал фондузунуӊ салбырыныӊ удуртукчузу Светлана Кенден чугаалаан.
Бир эвес электроннуг күш-ажыл дептерин хереглеп турар болза, ону саазынга парладып ап болур. Социал фондунуӊ клиентилер офизи биле МФЦ төвү ындыг документини берип турар. Специалистер аӊаа таӊма биле хол үжүүн салып бадыткаар.
Ажылдап турар үезинде электроннуг күш-ажыл дептеринде медээлерни саазынга үндүртүп ап болур. Ол ажыл берикчизиниӊ техниктиг хандырылгазындан хамааржыр.
2021 чылдан тура чаа-ла ажылга кирип алган улустуӊ күш-ажылчы дептерин черле электроннуг хевирге кылыр. Саазын күш-ажылчы дептерниӊ орнунга ооӊ электроннуг хевирин кайы-даа үеде шилип ап болур.
Россияныӊ Социал фондузунуӊ Тыва Республикада
салбырыныӊ медээлеринден Р. Демчик белеткээн.