55-ки бригадага ''гвардейжи'' хүндүлүг атты тыпсыр

Тываның Баштыңы Владислав Ховалыг бистиң ат-сураглыг 55-ки тускай мото-адыгжы (даг) бригадазынга ''гвардейжи'' деп хүндүлүг атты тыпсыр дугайында дилегни чурттуң Камгалал яамызының хандырганын дыңнаткан.

''Шак ындыг хүндүлүг атты тергииннерниң тергиини, эң-не тулган дээн шериг кезектерге тыпсыр болурун билир бис'' - деп, Владислав Ховалыг социал четкилерде бодунуң арыннарынга бижээн.

Тываның Баштыңы тускай шериг операциязының баштайгы хүнүнден тура Тывадан барган шериглерниң фашизмге удур демисежип турган эки турачы өгбелериниң алдар-адынга төлептиг болуп, эрес-дидим чоруу-биле гвардейжилер деп бедик атка төлептиин бадыткаан дээрзин медеглээн.

''Кажан-бир бис 55-ки тускай мото-адыгжы (даг) бригадазының дайынчы бүрүзүнүң эрес-дидим чоруктарының дугайында билип алырывыс чугаажок. А бо хүнде чаңгыс чугаалаар чүүлүм болза, олар шупту маадырлар-дыр. Бедик мергежилдии, дидим чоруу болгаш шериг хүлээлгезинге, эш-өөрүнге бердинген шынчы чоруу дээш бистиң оолдарывысты российжи армияда хүндүлээр, а дайзыннар олардан аргажок коргуп-сүртээр. Езулуг гвардия-дыр'' - деп, Владислав Ховалыг бижээн.