56 аныяк башкы даңгыраан берген.

Башкылар хүнүн уткуштур Кызыл хоорайга аныяк башкыларның ук мергежилге даңгырак бээриниң байырлалы болуп эрткен. Ук хемчегни чылдың-на эрттирери чаңчыл болу берген. Аныяк башкыларның деңнелин бедидип, оларның чогаадыкчы ажыл-ижиниң сайзыраарынга болгаш республиканың чаа өзүп орар салгалының кижизидилгезинге чугула херек.

Аныяк башкыларга Кызыл хоорайның Баштыңы Ирина Казанцева дээш оон-даа өске удуртукчулар келген.
Келген аалчылар аныяк башкыларга ажыл-ижинге чедиишкиннерни, уругларга ынакшылды күзээш, келир үеде оларга республика деңнелдиг деткимчелер бар дээрзин бүзүредип чугаалаан. Байырлыг ажыдыышкын соонда, башкылаашкын ажылын чаа эгелээн аныяктар мергежилинге шынчы болурунуң дугайында даңгыраан берген. 2022-2023 чаа өөредилге чылында 56 аныяк оолдар, кыстар башкылаашкын ажылынче дидим базымнарны кылып кирипкен.

Байырлыг хуралдың соонда, аныяк башкылар командаларга үстүп алгаш, янзы-бүрү оюннарны ойнаан. Чогаадыкчы талантызын, шилип алган мергежилинге бердингенин, бижик-билииниң бедиин бадыткааннар.