Өг-бүле, ынакшыл болгаш шынчы чорук хүнүнде Россияның социал фондузунуң Тыва Республикада эргелели күрүне деткимчезиниң акша-хөреңгизин кайнаар ажыглап болурунуң дугайында тайылбырны берген.
Ие капиталы – Россияда ажы-төлдүг өг-бүлелерни деткиир эң нептереңгей программаларның бирээзи. 2007 чылдан эгелеп, Тывада программаның ажылдап эгелээн үезинден бээр 58527 өг-бүле ие капиталының сертификаттарын ажыглаан, оларның иштинде 2025 чылда 738 деткимче кирип турар. 2007 чылдан бээр 48 муң ажыг өг-бүлелер ие капиталын чурттаар оран-сава байдалын экижидеринге ажыглаан.
Өг-бүле квартира азы хууда бажың садып ап, бар бажыңын улуг шөлдүг бажың-биле орнап, бажыңны тудуп азы чаартып, ипотекага ие капиталын баштайгы төлевир кылдыр киирип азы ипотека чээлизиниң чамдыызын төлеп болур. Тывада 2025 чылда 586 өг-бүлеге ипотека чээлизиниң баштайгы төлевирин база хуузун төлээринче ие капиталының фондузундан 380 ажыг сая рубльди
тускайлаан.
Уругларның өөредилгези – Тываның чурттакчыларының ие капиталын ажыглаар талазы-биле ийиги черде. Тывада 2025 чылда 202 өг-бүле уругларының өөредилгезинче 8 ажыг сая рубль акша-хөреңгини шилчиткен.
Ие капиталының акша-хөреңгизин ада-иениң пенсия чыылдазынче киирип, Пенсия фондузунче шилчидип болур. Программа эгелээнден бээр, Тываның 266 чурттакчызы ол эргени ажыглаан.
Тывада өг-бүлелер 2024 чылдың сентябрьдан эгелеп, сертификатта арткан акшаның хемчээли 10 муң рубльден ашпас болза, ону чаңгыс удаа төлевир хевиринге ап болур апарган. Бо чылдың эгезинден бээр республикада 281 өг-бүле 1,2 ажыг сая рубль түңнүг төлевирлерни алган.
2025 чылдың февраль 1-ден эгелеп ие капиталының хемчээли 9,5 хууга эде санаттынган, бир дугаар төлге 690 муң рубль, 2020 чылдың соонда ие капиталының төлевирин ап көрбээн ийиги азы үшкү дээш оон-даа ыңай уруг төрүттүнген өг-бүлелерге 912 муң рубль.
Россияның социал фондузунуң Тыва Республикада салбырының медээзинден.
Чурукту интернеттен хоолгалаан.
“Шын” №26 2025 чылдың июль 10