2020 чылдан эгелээш, ие капиталынга өскерлиишкиннер болган. Ооң мурнунда ие капиталын ийи дугаар азы ийиден хөй ажы-төлдүг өг-бүлелер ап турган болза, 2020 чылдан эгелээш, өг-бүлениң бир дугаар ажы-төлүнге база ук капиталды берип эгелээн. Оон эгелээш, РФ-тиң Социал фондузунуң Тыва Республикада салбыры 7265 ие капиталының сертификадын өг-бүлелерге тывыскан. Оларның 1081-ин 2024 чылда алган.
«Ие капиталының сертификадын алыр дээш, документилер чыып, билдириишкин киирип турбас. ХБАБ-тан келген документилерге үндезилээш, социал фонд ие капитал алыр дугайында шиитпирни үндүрер. Ие капиталын алыр дугайында медээ ада-иениң күрүне ачы-дузазында хууда кабинединге чедип келир» – деп, РФ-тиң Социал фондузунуң Тыва Республика талазы-биле салбырының удуртукчузу Светлана Кенден тайылбырлаан.
2024 чылда өг-бүлениң бир дугаар төлүнге ие капиталдың хемчээли – 630,4 муң рубль. Ийи дугаар уруг төрүттүнерге, 202,6 муң рубльди өг-бүле алыр. Бир эвес ийи дугаар уруг төрүттүнгенинге чедир ие капиталы албаан болза, ук өг-бүле 833 муң рубльди алыр.
Ие капиталы-биле чурттаар оран-савазын септеп, чаартып болур. 3 хар четпээн чашка ай санында бичиилеп ап болур. Уругларның өөредилгезиниң өртээнче киириштирип, кадыының байдалы кызыгаарлыг уругларга социал адаптация эртеринге чарыгдап болур.
Ие капиталы алыр эргелиг уруг 3 харлаан соонда ук капиталды ажыглалче киириштирип турар-даа болза, ийи-чаңгыс эртежик ажыглаан таварылгалар бар. 3 хар четпээн уругнуң ие капиталын ажыглаар дизе, ипотека алырда, чурттаар оран-сава айтырыы шиитпирлеп, бажың садып алганда, киириштирер. Кадыының байдалы кызыгаарлыг уругга бир-ле бараан садып алырынга азы эмнээшкинге ажыглап болур.
Ук айтырыгга хамаарыштыр билдинмес чүүлдерни дараазында дугаарже долгааш, билип ап болур. 8-800-200-0543 телефон дугаарынче ажыл хүннеринде, 09.00 шактан кежээ 18.00 шакка чедир долгап болур.
РФ-тиң Социал фондузунуң Тывада салбырының медээзинден А. ОНДАР белеткээн.
“Шын” №79 2024 чылдың октябрь 16