"Шынның почтазындан"
70 артты ажып алган башкы
📢 Таварылга болуп, Сайлыг ортумак школазынга орус дыл башкылап ажылдай берген мен. 40 ажыг чыл төрээн школазынга ажылдап каапкан кижиге өске школа, өске коллектив сонуурганчыг болду.
Колдуунда аныяктар колдаан, ажылдаар арга-шинчилиг, эртем-билиг-биле шыырак чепсегленген коллектив болду. 2 каът школа чоокта чаа капитал септелге эрткен болгаш, чылыг, чырык. Кабинеттери үе-шагның аайы-биле дериттинген. Шупту 105 өөреникчи өөренип турар. 25 башкы уругларны билиглер-биле чепсеглеп, үе-шаг-биле деңге базып олурарлар. Коллективти А.А. Болат хөй чылдар иштинде удуртуп турар. Өөредилге-кижизидилге адырының удуртукчузу – аныяк химия башкызы Е.С. Холбен.
Оларның аразындан онзагайлап демдеглексээн башкым – 1 дугаар категорияның сан башкызы Ооржак Светлана Чымбааевна. Бо башкыны бичиимден тура билир мен. Спорттуң дараазында хевирлеринге – хаак, хол бөмбүү, тенниске – шыырак ойнакчы. Кожууннуң, республиканың чыынды командазының кежигүнү болуп чораан.
Башкы кижиниң чоргаарланыр чүүлү – өөреникчилери. Школага Светлана Чымбааевнаның берген билиглери шыырак болганындан, сан эртеминге сонуургалы олчаан кыптыгып, ол-ла угланыышкынга башкы эртеми чедип алган өөреникчилери бүдүн республикада. Оларның бирээзи – сан, информатика башкызы эртемниг, амгы үеде Чеди-Хөл кожууннуң Төлээлекчилер хуралының даргазы Ооржак Ай-Хаан Алексеевич.
Башкының стажы 44 чыл. Хүндүлүг дыштанылгаже үне берзе-даа, башкы кадрлар чедишпес болганындан республиканың кайы-даа булуңунда доостурган өөреникчизи чалаарга, чажам дивес, бар чыдар. Бо өөредилге чылында Сайлыг школазында ажылдап келген. Доозукчу класстың өөреникчилери-биле ажылдап, билиин харам чокка өргүвүшаан хевээр.
Светлана Чымбааевна чүгле эки башкы эвес, а төлептиг ие. Ол 5 кысты өстүргеш, эртем-билигге чедирип, ниитилелдиң төлептиг кежигүннери кылып каан. Хөй санныг уйнуктарының хайыралыг ынак кырган-авазы.
Чон аразынга эскертинмес, көскүлеңейнип чорбас, бөдүүн, биче сеткилдиг башкывыс бо чылын 70 харны харлап, 70 артты ажып алган.
Анна Чымыыжык,
Сайлыг школазының орус дыл, литература башкызы