70 ажылдакчы билиин бедиткен

Культура ажылдакчылары “Культура” национал төлевилел-биле кады ажылдап турар “Чогаадыкчы кижилер” деп регионалдыг төлевилел-биле билиин бедидер. Төлевилелдиң сорулгазы — 2024 чылда культура ажылынче хаара туттунган кижилерниң санын көвүдедири. Ынчангаш чылдың-на культура болгаш уран чүүл ажылдакчыларының билиин федералдыг Үзүктел чок өөредилге төптеринге бедидер. Ол ышкаш культура адырында чогаадыкчы болгаш удуртукчу кадрларның билиин Красноярскының күрүнениң культура институдундан Россияның Гнесиннер аттыг хөгжүм академиязынга чедир Россияның бүгү-ле чогаадыкчы дээди өөредилге черлеринге бедидер. Бо чыл эгезинден тура шак ынчаар национал төлевилел ачызында Тываның культура албан черлериниң 70 ажылдакчызы билиин бедиткен.

2019-2023 чылдарда “Культура” национал төлевилелдиң боттанып келген үелеринде Тываның 569 культура болгаш уран чүүл ажылдакчызы билиин бедиткен. Бо чылын национал төлевилел-биле 147 культура болгаш уран чүүл ажылдакчыларының билиин бедидер сорулга салдынган. Оларның чартыы 2024 чылдың бирги чартыында Дмитрий Хворостовский аттыг Сибирьниң күрүнениң уран чүүл болгаш Казаньның күрүнениң культура институттарынга өөредилгени эрткен.

Культура ажылдакчылары уран чүүлге өөредилге болгаш чогаадылга адырынга кадыы кызыгаарлыг кижилерни ырактан өөредир технологияларны, концерт программаларының болгаш өске-даа хөй-ниити хемчеглериниң башкарыкчызының мергежилиниң тургузуун, чурагайлыг технологиялар ажыглаарының дуржулгазын, культура албан черлеринге мультимедийлиг контент тургузарының, культура-массалыг хемчеглерниң режиссуразының, балетмейстер ажылының болгаш оон-даа өске билиглерниң үндезиннерин шиңгээдип алганнар.

Культура болгаш уран чүүл ажылдакчыларының профессионал билиглерин болгаш чаңчылдарын экижидери-биле оларның билиин бедидип турар. Ол ышкаш боттарының ажылчын хүлээлгелерин элээн шынарлыг күүседир болгаш чонга чедирип турар ачы-дузазының шынарын бедидер аргалыг. Оон ыңай республиканың культура албан черлериниң амгы үениң угланыышкыннарынче бар чыдарын, ажылдакчыларның мурнакчы практикаже болгаш бодунуң адырында чаа аргаларже кирер арга барын хайгаараар.

Ч. СААЯ белеткээн.