2023 чылдың часкы келдиртилгезинде Тыва Республиканың шериг комиссариады 700 хире оолдарны шеригже кыйгыртыр дээрзин республиканың шериг комиссары Демир-оол Артына часкы келдиртилгеге тураскааттынган брифингиге медеглээн.
Часкы келдиртилгени эрттирериниң чурумунда эрткен чылдардан ылгалы бээр чүүлдер чок. Ооң организациязының болгаш чорудулгазының үезинде чаа коронавирус инфекциязының халдавырын, шериглерниң ортузунга сезон аарыгларының (ОРВИ, грипп, ангина) нептерелин болдурбазынче кичээнгейни угландырар. Ол ышкаш сорулгаларда: Россияның ДОСААФ-ынга мергежилдиглерни белеткеп доозары болгаш белеткел эрткеннерни шериг албанын эрттирери-биле өй-шаанда аъткарары; чыылда черлеринде шериг албанныгларны болур-чогуур норма-чижектерге дүүшкен аъш-чем аймаа-биле хандырары; шериглерже аарыг-аржык болгаш көрдүнген негелделерге дүүшпейн турар кижилерни чорударын болдурбас.
Республиканың 12 муниципалитединде шеригже часкы келдиртилге чоруп турар дээрзин Демир-оол Артына демдеглээн. Ону доктааткан чурум езугаар чорудуп турар. Келдиртилге комиссияларының хуралдарының бетинде профессионал психологтуг шилилгени чорудары көрдүнген.
Кадыкшылының байдалы, эртеми, шериг-учет мергежилиниң аайы-биле белеткелдиг болгаш профессионал психологтуг шилилгениң түңнелдери-биле, шериг албан-хүлээлгезин эрттирип болур деп санаткан хамаатыларга хамаарыштыр дараазында шиитпирлерни хүлээп алыр:
• шериг албанынче келдиртилгеден соңгаарладыышкынны бээри азы хостаары;
• Чепсектиг Күштерниң, өске шериглерниң болгаш хевирлээшкиннерниң хамаарышкан хевирлеринче шериг албанынче кыйгыртыры, а ол ышкаш шериг комиссариаттарынче чыылда черлеринге келдирткеннерниң чеде бээр хуусаазын дыңнадыры.
Республиканың чыылда черинге келдирткеннерни изиг чем-биле чемгерер, чаа шериг идик-хеп-биле эде хепкерер. Чепсектиг Күштерниң одуруунче кыйгыртып турар хамаатыларның ыяап-ла күрүнениң салаа изиниң бүрүткелин чорудар.
Шериг албанынче баштайгы аъткарылганы апрель 20 хүннеринде планнаан.
Бистиң оолдарывысты Россия Федерациязының Камгалал яамызының спортчу роталарынче чорудар практиканы уламчылаар бис. Тывадан беш хире шеригже келдирткен оолдар спортчу роталарже аъттаныптар.
Сөөлгү чылдарның часкы келдиртилге кампанияларының түңнелдери-биле алырга, шериг албанынче хамаатыларны келдирер даалгазын Тыва Республика долу хемчээлдиг күүседип турар.
Россия Федерациязының хоойлужудулгазында доктааттынганы езугаар, часкы келдиртилге 2023 чылдың апрель 1-ден эгелээш, июль 15-ке чедер.
/ А. ХЕРТЕК белеткээн.
Чурукту интернет четкизинден алган.
"Шын" №29 2023 чылдың апрель 22
700 хире оолдарны шеригже кыйгыртыр
23 апреля 2023
55