77 харлыг чемпион Мөңгүн-оол Түлүш

Тыва Арат Республика ССРЭ-ниң составынче киргенинден бээр 80 чыл оюнга тураскааткан хоочуннар аразынга республика чергелиг шыдыраа маргылдаазы Кызыл хоорайның Аныяктар ордузунга юбилейниң бүдүүзүнде, октябрь 10-да болуп эрткен.

Аңаа 60 хардан өрү назылыг 26 эр-херээжен шыдыраачы киришкен. Киржикчи бүрүзүнге бир салыгда 15–15 минута көрдүнген, кыскалаткан үелиг маргылдаа 9 салыглыг швейцар система-биле болуп эрткен.
Чаңгыс хүн дургузунда шыдыраа хөлүнге ачыр-дачыр демиселдиң түңнелинде ап болгу дег 9 сандан 7,5 санны чаалап алгаш, шыдыраага Тыва Республиканың чемпиону чораан, 77 харлыг спорт мастеринге кандидат Мөңгүн-оол Түлүш (Улуг-Хем) юбилейлиг турнирниң чемпиону болган.

База-ла ол хире санныг дооскан Олег Дамбиев (Кызыл) тиилекчиге немелде көргүзүглер-биле четпейн барган.

Бай-Тайганың төлээзи Харлыг-оол Хертек (7 санныг) дыка шыырак киржикчилерни ажып каапкаш, үшкү черге төлептиг болганы маргылдааның база бир солун медээ ажыдыышкыны болган.
Юбилейлиг турнирниң тиилекчилерин акша шаңналы эдеринчилиг медальдар, хүндүлел бижиктер-биле шаңнап-мактаан. Ол ышкаш эр киржикчилер-биле деңге ойнаан хоочун херээжен шыдыраачылар Анастасия Күжүгетти, Марина Доржуну болгаш Елизавета Артнаны хүндүлел бижиктер-биле шаңнап демдеглээн.

ТАР-ның Совет Эвилелиниң составынга эки тура-биле каттышканындан бээр 80 чыл болган юбилейинге тураскааткан хемчеглер аразынче хоочуннарга шыдыраа маргылдаазын тыва Чазак кииргени улуг ужур-уткалыг болган. Чүге дээрге дыка хөй хоочун шыдыраачылар ол төөгүлүг болуушкун-биле барык чажыт бооп турар. Чижээ, күш-ажылдың болгаш спорттуң хоочуну Оңгак Куулар таптыг-ла 80 харлыг. А ССРЭ-ниң Социалистиг Күш-ажылдың Маадыры, Маадыр-ие Үрүле Шыыраповна Канданның оглу Улуг-оол Кандан 1944 чылдың октябрь 11-де дөрт харлыг турган. Улуг-оол Салчакович Кандан 84 харлыг улуг назылыг-даа болза, шыдыраазын кагбаан, маргылдаалар үспес киржир болгаш спорттуң бүгү хевирлериниң идепкейлиг аарыкчызы.

ТР-ниң Шыдыраа федерациязының президентизи Ренат Ооржактың дыңнатканы-биле, хоочуннар маргылдаазы-биле чергелештир, арткан шыдыраачылар аразынга дүрген ойнаар база-ла юбилейге тураскааткан блиц-турнир ТывКУ-нуң «Гроссмейстер» шыдыраа клувунга болуп эрткен. Аңаа бичии уруглар аразынга Россия Кубогунуң ийи дакпыр тиилекчизи, Кызылдың 15 дугаар лицейиниң өөреникчизи Арина Иргит бүзүрелдии-биле тиилээн.

Арина Иргиттиң тренер башкызы Сергей Түлүштүң чугаазы-биле, Арина Россияның чыынды командазының составынче кирип турар болгаш, удавас октябрь төнчүзү, ноябрь эгезинде Бразилияга болур Делегей чемпионадынга киржир дээш, белеткенип турар.

Дүрген ойнаарынга республиканың шыырак шыдыраачыларының бирээзи Сылдыс Балчый 2 дугаар болган. Үшкү черни Кызылдың 2 дугаар школазының өөреникчизи, 12 харлыг спорт мастеринге кандидат Начын Чамзы чаалап алган.

Мерген КЫРГЫС.
Авторнуң чуруктары.
«Шын» №78 2024 чылдың октябрь 12