Эрткен неделяда Каа-Хем кожууннуң төп эмнелгезиниң тургустунганындан бээр 90 чыл оюн Сарыг-Сеп сумузунга демдеглеп эрттирген. Аңаа тус черниң чурттакчы чону, ук эмнелгениң хоочуннары, амгы коллективи болгаш удуртукчулар хөй болган.
Байырлыг хуралга ТР-ниң Чазааның, ТР-ниң Дээди Хуралының, ТР-ниң Кадык камгалал яамызының, «Ада-чурт камгалакчылары» күрүне фондузунуң регионалдыг салбырының, Каа-Хем кожууннуң чагырга чериниң төлээлери байыр чедиргеш, шаңнал-макталдарны, өөрүп четтириишкин бижиктерин эмнелгениң ажылдакчыларынга тывыскан.
Байырлыг хуралга медицина эртемнериниң доктору, ТР-ниң алдарлыг эртем ажылдакчызы, Тыва Республиканың эмчи-социал айтырыглар болгаш башкарылга талазы-биле эртем-шинчилел институдунуң кол эртем ажылдакчызы Людмила Эрдыниева «Тыва Республиканың чонунуң кадыкшыл байдалы болгаш демографтыг чорудулгазы» деп темага илеткелди кылган. «Тыва Республикада инсульт аарыының дарый эмнээшкиннери» деп темага илеткелди медицина эртемнериниң кандидады, чүрек, хан-дамыр аарыгларының кезер эмчизи Росси Күжүгет илеткээн.
Каа-Хемниң төп эмнелгезиниң ниити аарыглар эмчизи Татьяна Вяткина коллективинге байырын чедирген:
– Амгы үеде эптиг-демниг ажылдап турар коллективимге кожуунувустуң, республикавыстың чонунуң кадыкшылы дээш ам-даа тура дүшпейн ажылдаарывысты, ал-бодувуска кадыкшылды күзээр-дир мен. Эмчи кижиниң ажылы дыштаныр хүн деп чүве билбес. Ынчангаш кады ажылдап чоруур эш-өөрүмнүң өг-бүлелеринге, чоок кижилеринге шыдамык чорук артык эвес. Чон байырлап турда азы дүне дыштанып удуп чыдырда, уйгу-чыдын чок ажылдаар мергежил болгай.
Айслана Донгак тускай шериг операциязынга киришкеш келген. Ол ам Каа-Хем кожууннуң төп эмнелгезиниң ниити аарыглар эмчизи:
– Ажылдап эгелээн үелеримден бээр безин дыка хөй чаа өскерлиишкиннер болган-дыр. Дайынчы хөделиишкиннерде киржип турар чаңгыс чер чурттугларымга болгаш тус черниң тайбың чурттакчыларынга эмчи дузазын чедирип турдум. Тываже дедир чанып келгеш, бо эмнелгеде ажылдай бер- дим — деп, эмчи чугаалаан.
ТР-ниң Кадык камгалал яамызы тургустунгандан бээр 90 чыл болган төп эмнелге 1 сая рубльдиң сертификадын белекке берген. Белекке алган акша эмнелгениң материал-техниктиг баазазын чаартырынга чугула херек дээрзин Каа-Хем кожууннуң төп эмнелгезиниң улуг эмчизи Чодураа Куулар чугаалааш, коллегаларынга байырын чедирген.
Байырлыг хурал оюн-тоглаа, танцы-сам-биле уламчылаан.
Айдың ОНДАР.
Чай-Хаан ДОНГАКТЫҢ тырттырган чуруктары.
«Шын» №41 2025 чылдың октябрь 23